Sagang sa kopras

Reelectionist sa eleksiyon karong Mayo 14 way tarung kinatulgan. Napanid-an sa iyang kaubanan nga di mahimutang sa ilang mga tigom. Kini bisan sa ka-inila sa iyang pamilya ug kalig-on sa ilang partido nga nangharos sa nangaging mga piniliay.

Human sa gamay'ng pakisusi, nahibaw-an sa kaubanan sa politiko ang tinuod nga hinungdan sa iyang bugnaw'ng singot. Ang iyang kaatbang nga dugay nang nabantog nga kuwartahan may talagsaong paagi sa pagpalit sa iyang mga kapitan aron paglikay nga koprason siya sa eleksiyon. May pakapin nga pasidaan nga kon mapilde ang kandidato sa ilang barangay, may mga tawo siya nga wa igdungog sa ilang kamahigalaon nga mosuroy sa ilang mga panimay ug maningil sa bugti sa kuwarta nga ilang nadawat.

* * *

Sa makausa pa, gilusad na sab sa DYAB Abante Bisaya ang Kapamilya Relief Campaign alang sa mga biktima sa dakong sunog sa Barangay Tinago sa Dakbayan sa Sugbu. Ang labing dinaliang panginahanglan sa mga biktima mao ang bugas ug ubang pagkaon nga dali rang hikayon, mga kaldero ug ubang gamit sa kusina, sabon, tambal ug mga sinina. Matod ni Barangay Kapitan Joel Garganera nagkinahanglan sab sila og mga balde, planggana, galon ug ubang mga sudlanan sa tubig.

Maong manuktok na sab mi sa inyong malumo nga mga kasingkasing. Palihug ipada lang ang inyong mga hinabang sa South Bus Terminal sa Natalio Bacalso Ave., Cebu City, sa barangay hall sa Mabolo, Cebu City, o sa ABS-CBN Regional Broadcast Complex sa Jagobiao, Mandaue City. Puston ug i-apud-apod na namong unang hugna sa mga hinabang karong semanaha. Daghang salamat daan.

* * *

Duha ka birthday celebrants, pulos mga magpapatigayon, nagsaulog sa ilang sumad sa adlaw'ng natawhan pinaagi sa pagtabang sa labing nagkinahanglan. Ang magpapatigayon sa Mandaue nigahin sa iyang birthday uban sa kabos nga mga pasyente sa Mandaue ug Opon ug nihatag og P10,000 sa DYAB Abante Bisaya nga among gipananghid nga alang sa atong scholars sa Guinsaugon, St. Bernard, Southern Leyte. Samtang ang magpapatigayon sa Dakbayan sa Sugbu niamot sab sa P5,000 nga alang unta sa iyang party.

Hinaot nga daghang moliwat ninyong duha. Apan di kinahanglang dagko ang mga donasyon alang sa mga biktima sa sunog sa Tinago, survivors sa Guinsaugon ug ubang mga biktima sa katalagman. Dakong bahin sa dul-an sa usa ka milyon ka pesos nga nakolekta sa radiothon sa KBP Cebu Chapter sa niaging tuig mao ang P1, P5, P10, P20 ug P50 gikan sa taxi ug PUJ drivers ug P100 ug P500 gikan sa mga tag-iya og mga sakyanan nga nangagi sa Fuente Osmeña Rotunda. Ug ang labing dakong trabaho sa paghakot, pagpamutos ug pag-apud-apod sa mga hinabang giabaga sa mga sakop sa Association of Concerned Texters (ACT) ug ubang mga boluntaryo.

* * *

Email: leo_lastimosa@abs-cbn.com