Kalit nga paghilom sa PDEA

Dugay rang gipasalig sa Philippine Drug Enforcement Agency nga nailhan na nilang mga tawo nga kakonsabo sa sindikato nga nagbasi sa Australia nga maoy responsabli sa pagpayuhot sa P3.6 bilyones nga kantidad sa pseudoephedrine niadtong tuig 2004.

Dugay ra pong gipagarpar sa PDEA nga sa dili madugay ila nang isang-at ang kaso batok sa mga local contacts sa sindikato. Gani, ila nang gipakita sa pipila ka mga sakop sa media kaniadto ang kopya sa affidavit sa mga opisyal sa kapolisan nga apil sa operasyon pagsakmit sa maong kargamento diin nagbulgar ni sa mga ngalan sa mga personalidad nga nalambigit sa maong illegal nga kalihukan.

Usa sa mga gihinganlan sa affidavit mao ang usa ka politiko nga kanhi naghupot og dakong pwesto sa lalawigan sa Sugbo.

Ang legal officer sa PDEA didto sa kaulohan nga si Atty. Lydia Bundac dugay rang mipasalig nako nga kumpleto na kuno ang tanang mga dokumento ug gani matud niya niadtong may duha na ka semana ang milabay niyang gitakdang ipasaka ang kaso didto sa Department of Justice.

Apan niadtong adlaw nga unta ilang ipasaka ang kaso, nahanaw daw bula si Bundac, di na makig-estorya. Sud na sa duha ka semana nako nga giadlaw adlaw og tawag sa iyang telepono si Bundac, apan magpunay lang kini og ring di gyud tubagon.

Ambot og unsay rason sa iyang paglikay-likay. Apan hinaut nga wa siyang kabayri aron di nalang ihinayon ang pagpasaka sa kaso.

* * *

Gitugyan na man unta sa House Committee on Dangerous Drugs ang imbistigasyon niini ngadto sa National Bureau of Investigation, apan nganong ang PDEA lang gihapon ang padayong naghupot niini? Nganong di gustong buhian sa PDEA ang maong kaso?

Nakadawat na kaha ang mga opisyal sa PDEA, aron tapin-an ang mga sakop sa sindikato dinhi sa Sugbu hinungdan nga bisan og gipatugyan na ngadto sa NBI ang kaso, padayon gihapon nila kining gihuptan?

Nahibawo kong nalinga na ang mga kongresista nga sakop sa komitiba sa ilang preparasyon sa kampanya, apan hinaut nga di nilang hikalimtan ang maong kaso. Usik ang mga panahon nga inyong nasugdan sa pag-imbistigar niini kon di ninyo ipadayon.

Usa sa mga nangusog og maayo nga mapasakaan og kaso ang mga local contacts sa sindikato mao si Kongresista Antonio Cuenco. Hinaut nga tutukan pagbalik ni Cuenco ang maong kaso kay nabalaka ko nga naareglo nang mga opisyal sa PDEA.

* * *

Bilib ko's ka prangka ni senatorial candidate Loren Legarda. Lahi sa ubang mga kandidato nga bisan sila sayod nga imposibling mahimo, ipasalig nga kab-oton aron lang maagni ang botante nga mosuporta.

Si Legarda dinhi sa Sugbo niadtong Sabado aron pagtambong sa awarding sa Cebu City Charter Day. Sa wala pa siya moadto sa awarding, nakahigayon mi sa pagpakighinabi niya didto sa usa ka restaurant sa Ayala.

Ako siyang gipangutana kon unsay iyang mahimo alang sa pagprotehir sa iyang mga kauban sa propisyon taliwa sa nagpadayong pagpamatay sa mga sakop sa media. Kumo siya usa ka sakop sa media sa wala pa mosulod sa politika, nagpaabot ko'g tubag nga litaniya sa posibling mga balaudnon nga iyang isang-at sa higayon nga siya mapili pag-usab isip sakop sa Senado.

Apan, yano ug simple ray tubag ni Legarda sa akong pangutana. Matud niya, wa na kinahanglana nga mopasar pag balaud ang Senado alang sa pagprotehir sa mga sakop sa media. Matud niya nga ang gikinahanglan dili balaud kon dili aksiyon gikan sa kapolisan.

Husto si Legarda, wa tuod kinahanglana ang balaud aron kaprotehian ang mga sakop sa media. Ang gikinahanglan mao ang abtik ug madasigong aksiyon sa kapolisan pagsulbad sa mga kaso nga naglambigit pagpatay sa mga sakop sa media.

Ang Secretary General sa International Federation of Journalist nga si Aidan White, sa iyang report nga gipublikar sa blog sa Philippine Center for Investigative Journalism blog, siya miingon nga sukad milingkod si President Gloria Macapagal Arroyo niadtong 2001 pinaagi sa popular nga people power revolution, moabot na sa 49 ka mga media practitioners ang gipatay.

Ang maong gidaghanon sobra pa sa natala atol sa martial law diin ang nasud ubos sa pamunoan sa diktador nga si Ferdinand Marcos.

* * *

E-mail: [email protected]