Pamalandong Matag Domingo
Marso 4, 2007: Ikaduhang Domingo sa Kwaresma
Mga Pagbasa: Gen. 15:5-12,17-18/Fil. 3:17-4; 1/Lk. 9:28b-36
Dili lang gyud tuyoon nga usahay moabot gyud ang kawalay paglaom ug gana diha sa pagbuhat og mga gimbuhaton nga dunay kalabutan sa gitawag nilang kalamboan (Espirituhanon ug Kalibutanon) labina kun walay igong ayuda sa mga hingtungdang kagamhanan (Eklesiyastikal ug Politikal). Mao tingali nga ang pulong kausaban gitabanan gyud og risgo. Risgo nga naglambigit usab sa kaugalingong pagtahan ug pagpasakit.
Ingon niini usab ang gidangatan sa atong Ginoong Jesu-Kristo. Ang iyang mahimayaong pagkausab maoy usa ka hitabo nga iyang pagaagian sa dili pa siya moadto sa Jerusalem diin didto siya pagapatyon ug pahamtangan sa usa ka makauulaw nga silot diha sa paglansang sa krus. Apan ang maong kausaban sa iyang panagway nagsimbolo usab og kadaugan batok sa mapintas nga pagdaog-daog sa yawan-ong pagsulay nga bunga sa dili husto ug hiwing sistema sa iyang kapanahonan.
Gipahimug-atan ang tema: "Deus Caritas Est: Living the Spirituality of Stewardship in the Year of Social Concern" sa atong Artsdyosesis. Mapanghinauton lamang kita nga kini motuhop sa kinatibuk-ang panghunahuna aron ang tanan ginamit ang hustong doktrina nga inubanan sa usa ka madasigong pag-ampo ang tanan gayud makig-asdang sa pader sa mga establisamento, mga tawo, ug mga relihiyosong pagdagmal sa kinabag-an ning atong kalibutan. Dili paigo ang debosyon, maingon nga dili usab paigo ang pagpunay lang og martsa sa kadalanang abogon. Hinunoa, angayang molihok una ang tagsa-tagsa ka kaugalingon sa dili pa manginlabot sa mga isyung katilingbanon.
Ang pagkausab sa panagway sa atong Ginoo nagdapit kanato sa pagtungas bahala nag kutas sa bukid sa katilingbanong pagpatidlum sa mga panghitabo ug sa mga timaan sa panahon. Kay dili husto ug tukma ang magpabilin kita diha sa mga hiwing naandan o dili ba kaha hinuon ang pagtalikod sa mga hustong naandan tungod ug alang sa gitawag nilang kalambuan. Kon buot kitang mahimong gawasnon ug mohamtong kinahanglang morisgo kita bahala na kon kini sakit og nagkahulogan og kamatayon.