Halad sa Sugbu

Gawas nga hanap ang pahibawo ni Gobernador Gwen Garcia nga makigsulti siya sa 5,000 ka pamilya nga iyang gipalayas gikan sa mga luna 11 ka mga barangay sa Dakbayan sa Sugbu nga gipaubos sa Provincial Ordinance 93-1, may pasiuna nang mga tilimad-on nga bisan unsa may katuyoan sa pagkausab sa sabaw ni Garcia wa ni maglakip sa matinud-anong pagpaminaw sa mga hinungdan sa kalangay sa kinabag-an sa mga molupyo pagbayad sa Kapitolyo ug sa ilang determinasyon nga magpakamatay pagsukol kon papahawaon gikan sa ilang mga pinuy-anan.

Samtang kalibogan pa kon ang pakigsulti ni Garcia alang ba sa pagpabilin, pagbalhin o paghingilin sa kabos nga mga pamilya, naklaro na unsay tuyo sa iyang igsuon ug security consultant nga si Byron Garcia, nga di sakop sa komitiba nga iyang gitukod pagpakigsulti sa mga molupyo, pag-adto sa Barangay Luz aron pagpakigsulti sa mga molupyo nga di sakop sa 11 ka kahugpongan ug pagpapirma nila og petisyon pagkuwestiyon sa napamatud-an nang liderato ni Konsehal Nida Cabrera batok sa gihulgang demolisyon.

* * *

Nagtagbo ang tanang tigpasiugda sa scholarship alang sa mga tinun-an nga nailo sa ilang mga ginikanan ug mga igsuon sa katalagman sa Guinsaugon, St. Bernard, Southern Leyte aron pagsusi sa kahimtang sa programa usa ka tuig human kini nalusad. Ang Ramon Aboitiz Foundation Inc. (RAFI), nga maoy tagduma sa pondo, nitaho nga maayo ang pagtungha sa mga tinun-an ug nga inanay na silang nakahilwas sa pagbangotan aron pagsugod sa bag-o nilang mga kinabuhi. Apan nitaho sang RAFI nga tungod sa kapakyas sa pipila ka kahugpongan pagtuman sa ilang pledges pagsugod sa programa sa niaging tuig nagkinahanglan og dugang P200,000 aron makatiwas ang tanang tinun-an sa ilang mga kurso.

Tungod ini, nahukman sa mga tigpasiugda nga awhagon ang Kapisanan ng mga Brodkaster ng Pilipinas (KBP) Cebu Chapter pagpasiugda og laing radiothon aron pagpangayo og dugang hinabang. Si KBP Cebu Chairman Edward Abad nitataw nga kinahanglang pahinumdoman ang katawhan nga wa pa mahuman ang makiangayong tahas pag-umol og mas sanag nga kaugmaon alang sa batan-ong mga biktima sa katalagman.

* * *

Nahingpit nang pangandam alang sa talagsaong proyekto ni Dr. Jose "Sir Dodong" Gullas pagpasidungog sa duha ka labing bantogang Sugbuanong kompositor: Silang Ben "'Yo Karpo" Zubiri, ang nagtagik sa "Matud Nila"; ug Vicente "Inting" Rubi, ang nagmugna sa "Kasadya". Ang "Halad: Sugbuanong Kanta" ipahigayon karong Miyerkules sa gabii sa Casino Espanol de Cebu ug isibya sa DYAB Abante Bisaya.

Gipahibawo ni Sir Dodong ang iyang giplanong kalihokan sa niagi pang tuig atol sa iyang pakigtagbo sa mga representante sa mga pundok nga nagpakabana alang sa dila nga Sugbuanon. Gawas sa pagpasidungog sa mga kabanay nilang Zubiri ug Rubi, gusto sab niyang mapahibawo sa tanang hingtungdan nga iya sa Sugbu ang mga awit nga gi-uran-uran na lang pagpatokar ug pag-angkon sa kaulohan.

* * *

Email: [email protected]