Cell-0927-2323286

Ang lindog nako kabahin sa gisugyot nga "Backyard Gardening" ni Konsehal Jonas Cortes sa dakbayan sa Mandaue, nakapasuko sa pipila ka lumulopyo sa maong dakbayan nga wala makagusto ni Jonkie Ouano.

Akong klarohon, walay problema nga mopadangat mo sa inyong baruganan kabahin sa isyu nga atong gituki, apan dili usab makiangayon nga moingon mo nga anaa ko sa payroll ni Jonkie abi kay gilabanan nako siya.

Kuhaa kuno ang payroll nga inyong giingon, unya dad-a diri nako kay ako na lay bayad sa pagpapublikar niini bali'g usa ka pahina sa mantalaan.

Ang holder sa cellphone 0927-2323286 maoy nagpasangil nako nga anaa ko sa payroll ni Jonkie.

Ang maayo nimong buhaton, susiha kon pilay akong sweldo nga madawat matag buwan sa pagka senior reporter ug columnist sa The Freeman, unya columnist sa Banat News ug senior reporter sa DYLA.

Kon moabot ang higayon nga dunay maayong isyu nga mopabor ko ni Jonas Cortes, nagpasabot ba diay nga gibayran kong Jonas?

Ang maayo nimong buhaton mao nga palapdan nimo'g gamay ang "hiktin" ra kaayo nimong panabot.

Kon toohan nato ang imong argumento nga kay milaban kong Jonkie gibayran ko, naa usab diay ko sa payroll ni Kongresista del Mar ug ni Mayor Tomas Osmeña kay usahay modapig man ko nila?

Ang maayo nimong buhaton, kay dia man ko ma-assign karon sa City Hall sa dakbayan sa Sugbu, susiha ang mga konsehal ug ubang opisyal kon nagpangayo ba ko nila bisan usa ka sentimo.

Kapin ko sa 10 ka tuig nga nahimong police reporter, pangutan-a ang kadagkoan sa kapolisan kon nangayo ba ko nila og kwarta og bisan usa ka tulo sa gasolina para sa akong mga sakyanan.

Gituki nako ang isyu nga backyard gardening ni Konsehal Cortes kay gigamayan ra man god ko sa maong plataporma niya sa politika. Kon gusto ka nga pala-palahan ang imong kandidato, iladlad ang iyang plataporma.

Imo diay kong but-an kon gusto ko nga si Jonkie ang mahimong mayor sa Mandaue?

Usbon nako, gibutang nako ang numero sa akong cellphone aron paghatag ninyo og higayon nga maka-komentaryo apan ayaw lang ang personal kay aron nindot ang pagbayloay nato sa mga punto.

Sama ni Mayor Osmeña, buotan kong pagkatawo apan maldito kaayo ko kon inyong binuangan. Hunong na lang mo pagpadala og init nga mensahe sa text kay ang isog nga tawo makigkita sa tawo nga iyang gikasuk-an.

* * *

Nakaamgo og leksyon kadtong mga sakop sa usa ka grupo nga nadakpan sa kapolisan kay sila nagpatoo man usab nga mga tigpatuman sa balaod.

Wala g'yod sila mahadlok nga nagdala-dala og armas nga walay gun ban exemption gikan sa Comelec, ingon man nagsul-ob og mga uniporme nga gigamit sa militar.

Nindot ang ilang gihimo kay gidakop man nila ang mga mangingisda nga nakalapas sa balaod, apan kay dili man sila mga tinugyanan sa balaod, nakahimo sila og salaod.

Ambot, lisensyado ba god ang ilang armas? Kini ra bang ubang mga hilig kaayo mosalmot og kahugpongan, kwestyonable ang dukomento sa ilang armas kay mantinil lang og mga Memorandum Receipt nga unta dili man sa gobyerno ang ilang armas.

Apan sagdi na lang unta, basta kay dili lang maghinambog sa ilang armas nga ipabugol g'yod sa pagluklok sa hawak. Ang mga lisensyadong firearms holder tagoan pa man gani, sila na hinoon ang maghinambog.