Submeter kuno

Gikan sa cellphone number 0926-2390929: Good day, Sir. Mangutana lang ko kon makapaputol ba ko sa nag-sub-meter sa amoa? Kay dili ang akong ngalan maoy narehistro sa VECO pero nipirma siya nga ni-wave siya sa iyang rights, nga dili na siya manghilabot whatever development diha sa balay nga iyang gipahawaan. Bale gibayran nako ang papers pagproseso niya sa VECO sa pagpataod og kuryente. So naisip nga ako na ang nag-stand pero ang nahitabo, nipirma pa siya sa tapad namo nga okeyhan niya nga mag-sub-meter. Kon ireklamo ni nako, dako kaha ang chance nga maputol ang ilang gipa-sub-meter bisan dili akong ngalan ang narehistro. Pero may pinirmahan man siya sa akoa." -- 0926-2390929 (Jan. 11, 2007--11:15:22)

Naglibog kog diyotay sa imong reklamo. Morag wala maklaro ang imong presentasyon sa imong problema. Buyno, sige na lang. Wala koy ideya mahitungod nianang giingon mong sub-meter. Nagpangutana ko sa akong mga kaila nga may diyotay'ng kabangkaagan bahin sa elektrisidad pero wala man sab sila makahatag nakog igong katin-awan. Mao nga niining puntoha, akong isugyot nga labing maayo gayod nga i-refer mo kining problemaha ngadto sa buhatan sa VECO. Nagtuo ko nga makatubag gayod sila sa imong mga pangutana ug makahatag kanimo sa gikinahanglan mong katin-awan. Salamat.

* * *

Sa laing bahin: "Good day, Sir. Unsaon nako pagkahibalo sa agency nga dili registered sa POEA? Do you know their number? Ang akong giaplayan nga agency naay cash bond worth P40,000. Please ipatik ni sa imong column. Thank you very much." 0921-5938523 (January 11, 2007 -- 15:06:08)

Sayon ra kaayo ang pag-ila sa agency nga dili rehistrado sa POEA. I-confirm nimo sa buhatan sa POEA kon rehistrado ba sa ilang buhatan ang usa ka ahensiya. Sulayig kontak ang number 416-7049. Wala hinuon ko makaseguro kon mao pa ba kana ang ilang numero karon. Basta kay mao kanang numeroha ang ilang gigamit sa una. Buhata kini sa labing daling panahon. Salamat sa imong pagsalig niining pinobre tang kolum.

* * *

(Sumbong ug reklamo? Text sa 0910-8105522)