Lain niyang sakit

Wa magdugay ang kahinam sa mga Sugbuanon pag-atang sa sunod nga lakang ni Gobernador Gwen Garcia human pugngi sa Dakbayan sa Sugbu ang multi-bilyones pesos nga proyekto sa Kapitolyo sa Banilad. Ang gobernadora wa igdungog nga magpaigot. Iyang gitino nga di masaypan sa mga nagtan-aw nga ang sunod niyang lakang mao nay katumanan sa iyang panganti nga, "watch me."

Ang gihimo sa gobernadora mao ang paghukas sa iyang kapa. Iya nang gipakita sa mga Sugbuanon ang tinuod niyang bayhon ug panagway. Nga nabantang lang sa mga kawani ug mga opisyal sa Kapitolyo ug sa pipila ka gidemalas niyang mga bisita nga nakaatol pagsaksi sa pag-ulbo sa iyang kasuko ug nakatilaw sa iyang kasaba nga di makaon bisan sa irong buang.

Si Garcia nanghinaot nga human sa labing uwahi niyang lakang mapapahuway nang nahibiling mga pagduda kinsay tinuod nga hawod sa Sugbu ug kon makuha bang tanan niyang gusto.

* * *

Apan wa matuman ang tanan niyang gusto. Ang bugtong napatak-opan mao rang mubo kaayong dan sa Larsian. Ang nahasol mao rang mga motorista nga gustong manglaktod gikan sa Fuente Osmeña Rotunda paingon sa Chonghua Hospital. Ug ang maglisod nga pasyente nga gisakay og ambulansiya nga way garantiya makaabot bang buhi kon kinahanglan pang molibot sa ubang kadalanan sa di pa kaabot sa tambalanan.

Nahimo lang hinuong sumsoman sa bugalbugal ang gikabalak-ang pagpanera pa ni Garcia sa uban pang kadalanan sa lalawigan. Tigpaminaw sa DYAB Abante Bisaya niingon nga sakit alang ni Garcia nga ang bugtong dan nga sama niyag ngan-ang Don Gil Garcia-gipanag-iya sa City Hall ug busa di niya kahilabtan. May mga nisugyot sab nga sumbalikon pagtak-op ang dan sa bay ni Garcia sa Banawa o ang agianan paingon sa iyang buhatan sa Kapitolyo. Ug nga di mahitabong tak-opan ni Garcia ang kadalanan sa IT Park kay kuwarta gihapon ang labing mahinungdanon alang niya.

May sukaranan hinuong kahadlok sa gatosan ka pamilyang nagpuyo sa Kalunasan. Kay matud ni Kapitan Alfonso Pintor ang Kapitolyo maoy tag-iya sa tanan nilang kadalanan. Nipasidaan si Cebu City Mayor Tomas Osmeña nga mogamit na siya og puwersa pag-abli sa agianan kon daghan nang Sugbuanon ang matanggong.

* * *

Bisan pa sa gipakita niyang kabangis, angay gihapon natong ipangaliya si Garcia. Nagkinahanglan siya'g tabang. Gawas nga natakdan sa sakit ni Marcos, may sakit sab siyang Imelda:

l Iyang protocol officers mopugos sa mga tagduma sa kalihokan nga iyang tambongan pagsugat kon moabot na si Garcia; ug

l Sa di pa siya modiskurso, kinahanglang ipatokar gyong iyang theme song nga, "Mabuhi! Mabuhi!"

Grabe nang iyang kahimtang. Dihang nakalimtan sa sakop sa media nga kuyog niya bisan asa pagpatokar ang CD atol sa iyang pagtambong sa kasumaran sa unang misa sa Limasawa, wa na magkadimao ang iyang diskurso.

* * *

Email: [email protected]