Paugatay

Gumikan sa isyu sa pagbinayloay og luna nga gipanag-iya sa kapitolyo ug sa siyudad miaslum ang maayong relasyon nila ni Governador Gwen Garcia ug Mayor Tomas Osmeña. Ang kaniadtong tam-is nga pahiyom sa gobernadora ug tisngi nga katawa sa mayor gipanghulipan na og pulos mugtok nga dagway. Dinhi nagsugod na ang paugatay sa duha.

Ang Ciudad Cebu nga proyekto sa kapitolyo nga nagkantidad og 2 bilyones kapin gipahunong sa siyudad. Gitambagan usab sa mayor ang mga negosyante nga dili mopalit sa luna nga gipanag-iya sa kapitolyo nga mahimutang sa city hall tungod kay dili siya mopagawas o mo issue og permit sa negosyo unya niining pagatukuron. Agi og tubag sa gihimo sa siyudad, ang kapitolyo mikoral sa dalan sa may Larsian nga gipanag-iya niini ug maoy isunod unya sa pagkoral ang access road didto sa may IT Park paingon sa Banilad.

Gipatun-an ni Mayor Tomas Osmeña sa mga abogado sa siyudad ang posibling legal nga lakang aron usab kwestyonon ang gihimo sa kapitolyo. Apan kinahanglan na nga mangandam ang siyudad kon asa balhina ang Bagong Buhay Rehabilitation Center, Drug Rehabilitation ug Cebu City Police Office nga pulos nahimutang sa luna nga gipanag-iya sa kapitolyo.

Dinhi atong nasubay nga nagsugod na sa pagdigahay sa ilang mga alas ang kapitolyo ug siyudad isip kabahin sa ilang paugatay. Si kinsa kaha nila ni Mayor Tomas ug Governor Gwen ang taas og utong sa ilang paugatay. Sa ilang paugatay aduna kahay makuha nga kaayohan ang publiko?

Sa laing bahin, dili angayan nga pakamatyan sa atong halangdong mayor ang kahimtang sa singko mil kapin ka mga botante nga naapektuhan sa land swapping deal tungod kay dili na gani kini sila angayang tabangan pa sa siyudad. Kining mga tawhana bintahuso. Gihatagan na kini sila kaniadto sa kapitolyo og kahigayonan nga maila ang luna nga gitarukan sa ilang mga panimalay pinaagi sa pagdata-data sa pagbayad niini sa ubos pa gayod nga prisyo pero unsay ilang gihimo, wa mamayad. Ang uban pa kanila gipamaligya ang rights sa dagko pa nga kantidad. Kon ikaw ang naa sa dapit sa kapitolyo di kaha ka masuko?

Magdugo man ang akong kasing-kasing gumikan sa mahimong dangatan ning mga tawong nanimuyo sa luna nga ubos sa 93-1 apan mas maayong mahatagan sila og leksyon sa ilang gihimo aron mamahimo silang ehemplo ug kapanaminan sa uban. Dili angayan nga tabangan kadtong mga tawo nga wa motabang sa ilang kaugalingon.