Alas o malas?

Pagka-swerte sa mga kandidato pagka-senador ubos sa grupo ni Presidente Arroyo. Gawas nga malibre ang ilang biyahe sa pagbisita sa presidente sa nagkadaiyang bahin sa nasud aron mag-ribbon cutting sa mga bag-ong negosyo o manghatag og health cards ug uban, apil pa silang makadawat sa sipang pakpak gikan sa libuan ka mga tawo nga mosugat sa presidente. Gawas nga personal silang i-indorso sa presidente sa bagang mga botante, hatagan pa sila og igong panahon nga makatungtong sa entablado ug makapagarpar sa ilang kandidatura.

Mao ni ang nahitabo sa dakbayan sa Bais sa silingang lalawigan sa Negros Oriental niadtong adlaw'ng Lunes. Personal nga gipang apod-apod sa presidente uban ni Bise Presidente Noli de Castro ang mga titulo sa yuta sa gatosan ka mga residente sa lugar. Normal lang sa mga tawo nga makita nga manghatag og titulo ang duha ka dagkong lider sa nasud uban ang lokal nga opisyal sa dapit. Apan gihangan sa mata ang pipila ka mga tawo nga nakitang niapil sa pagtunol sila si Zubiri ug Singson nga klarong walay nahimo aron makab-ot ang dugay na nilang gipangayong yuta.

Karon palang, nigawas na ang impluwensya ug makinarya sa administrasyon sa ilang mga kandidato. Sa pagsugod palang sa kampanya, kanunay nang gilakip sa presidente ang pag-aghat sa mga tawo nga suportahan ang iyang mga kandidato aron magpadayon ang kalambuan sa nasud. Si Presidente Arroyo ang giingong "alas" sa dose ka mga kandidatong senador ubos sa Team Unity sa administrasyon. Kung gasto lang sa biyahe ug makinarya ang hisgutan sa ilang kampanya, nakabintaha gyud og maayo ang mga kandidato nga gipas-an sa presidente.

Alas ang presidente alang sa mga kandidato ubos sa iyang grupo tungod sa iyang impluwensya sa mga lokal nga mga opisyal. Usa lang kasinghag sa presidente sa mga taga lungsod ug dakbayan bugti sa proyekto o usa lang ka diktar sa presidente sa mga opisyal sa mga ahensya sa gobyerno bugti ug pabor, makuha na sa Unity Team ang ilang bintaha itandi sa oposisyon. Alas ang presidente tungod kay nagtubo kini sa pamilyang politiko hangtud nga naniguwang nalang ubos sa anino sa politika.

Apan malas nga matawag ang mga kandidato nga nagpa-ubos sa pangan sa presidente. Tungod kay hangtud karon, wala pa gihapon mawala sa imahe sa presidente ang giingong pagpanikas sa miaging piniliay aron makahupot sa pwesto. Hangtud nga magpabiling dakong kwestyon ang liderato sa presidente, padayong magduwa sa huna-huna sa mga tawo kung dili ba buhaton sa kampo sa Malacanang ang giingong pagpanikas aron siguradong makasud sa magic 12 ang ilang mga kandidato karong Mayo.

Malas ang presidente alang sa mga kandidato sa iyang grupo tungod kay hangtud karon, kadudahan pa ang pagka-lehitimo sa iyang administrasyon. Kwestyonable pa kung ang mga tawo nga nipakpak ug ni-abiba sa iyang mga gipanghatag nga hinabang, mosunod ba sa iyang mando nga suportahan ang iyang mga kandidato aron magpadayon ang iyang mga programa. Hangtud karon, kwestyonable pa kung unsang klaseng mga programa ang gipasiatab sa presidente nga padayon man gihapong nagkutoy ang tiyan sa kadaghanan sa mga Pinoy ug daghan ang nakulban og kaldero ug nawad-an sa ilang mga pinuy-anan.

Malas tungod kay wala pa hingpit maila-ila sa presidente ang iyang mga kandidato. Usa ka higayon, gipa-ila sa presidente ang usa ka muslim nga kandidato nga sultan sa Brunei inay sultan didto sa Mindanao. Adunay mga higayon nga motutok sa nawong sa usa ka kandidato ang presidente una niya malitok ang panga'an ini aron siguruhong dili na mapalpak sa pagpaila sa iyang mga kandidato. Nagpahibawo lang ni nga gidali-dali ang line-up sa iyang mga kandidato.

Malas man o alas ang presidente alang sa Team Unity, panahon na aron hinuklugan sa mga kandidato unsang klaseng diskarte ilang himuon aron lang makapwesto sa pagka-senador. Dili sa tanang higayon makatabang sa kandidatura ang kanunay'ng pagsunod-sunod nila sa presidente. Mas maayo pang mag-iyahay og pangampanya ang mga kandidato sa administrasyon aron mabaligya ang ilang tinguha ug plataporma. Tungod kay hangtud karon, naka-marka pa gihapon sa agtang sa presidente ang pasangil sa pagpanikas sa 2004 elections ug ang matud pa, pag-hello niya kang Garci.