Fixers sa LTO Mandaue

Dili pa lang dugay personal nga nangobserbar kining tagsulat sa kalihokan sa mga fixers diha sa LTO Mandaue. Sanglit wala man sila makaila nako, kompiyansa lang kaayo silang mipasalir sa ilang modus operandi. Haskang paita. Mahal ang bayad. Dali ra tuod ang pag-process sa aplikasyon pero bunalan sab ang mga aplikante sa makabungog nga balayranan. Tag P120 diay ang ilang komisyon matag aplikante.

Sa gawas sa buhatan sa LTO (pero nasulod na sa LTO compound) may gibutang nga karatola nga "Beware of Fixers." Pero subo kaayong pamalandongon nga nagsulod-gawas lang ang mga fixers sa maong buhatan. Identified na kaayo kanang maong mga fixers diha pero wala gayoy makabadlong nila kay protektado sila sa usa ka tawo nga lig-on og koneksiyon sa maong buhatan. Mao nga lakip ang guwardiya dili makabadlong.

Dunay managsuon nga nag-fixer diha sa maong buhatan. Duna sad ing mga fixer nga dili momenos sa unom nga managsamag bansagon nga nagsugod sa letrang G. Kon sa mga Tagalog pa, "lantaran" ang operasyon niining maong mga fixer pero nganong wala man kini sila mabadlong? Duna gani usay fixer nga usa ka babaye diha. Maayo tingali nga hugtan sa LTO ang pagbantay niini.

* * *

Dunay nag-text nako nga hangtod sa akong pagsulat niini, Pebrero 6, 2007, wala pa gayod ma-release ang yearbook sa mga estudyante sa school year 2004-2005 sa San Roque High School sa San Roque, Mabini, Bohol. Nahisagmuyo na pag-ayo ang mga ginikanan ug mga estudyante tungod kay dugay na kaayo silang naghulat sa maong yearbook.

Attention, Mrs. Timaan sa San Roque High School. Sa imong text nako, Ma'am, miingon ka man nga sa Disyembre, 2006 o ba kaha sa Enero, 2007 ma-release na gyud ang nahisgotang yearbook. Nganong hangtod karon wala pa man lagi kana ma-release? Unsa ba gayod ang lintunganay nga hinungdan sa kalangan, Ma'am?

Gipadad-an ko na ikaw og sulat aron pangayoon ang imong habig kalabot sa reklamo sa mga ginikanan ug mga estudyante bahin sa ilang yearbook. Mitubag ka kanako pinaagi sa text ug misaad nga ma-release na kini sa Enero niining tuiga labing dugay. Pero nganong wala ka man makatuman sa imong saad, Ma'am? Tubaga ko, Ma'am.

(Sumbong ug reklamo? Text sa 0910-8105522)