Babag sa land swap

Namiligro nga mapornada ang dugay nang gihandom nga land swapping sa mga molupyo nga nag-akupar sa luna sa lalawigan sa Sugbo tali sa dakbayan ug lalawigan. Kini human mopalabang og resolution ang konseho sa dakbayan niadtong Miyerkules nga nagtinguha pagkanselar sa tanang development sa north district matud pa tungod sa suliran sa trapiko.

Gipaabot nga maapektuhan kon mapatuman ang maong resolution mao ang proyekto sa lalawigan diha sa luna nga giakupahan kaniadto sa Cebu International School diin giplano ang katukoran sa usa ka mall.

Nunot niini posibling hingpit nang talikdan sa probinsiya ang land swap deal diin nabutang sa seryosong hulga ang pagpamuyo sa mga residente sa mga luna nga ubos sa ordinance 93-1 sa probinsiya.

Di magsakit ang tiyan sa mga opisyal nga responsabli sa pagkapornada sa transaksiyon tungod kay di man sila maoy apektado. Nagsugod ang suliran sa planong binayloay og luna sa probinsiya ug dakbayan sa dihang mihimo og privilege speech si bise mayor Michael Rama naghulagway sa probinsiya nga modawat lang og limpiyo.

Ang maong pamahayag nakasuko kaayo ni Gobernador Gwendolyn Garcia hinungdan nga naputol kadiyot ang negosasyon. Sa dihang nibalik na unta ang negosasyon human hatagi og authority sa konseho si Mayor Tomas Osmeña ug sa probinsiyal board si Garcia aron magsabot.

Apan natandog sab ang garbo sa mga opisyal sa dakbayan sa dihang ang board miingon nga alkansi ang probinsiya niini tungod kay mas mahal ang kantidad sa luna nga ibaylo sa probinsiya.

Human sa maong pamahayag gipalabang kagahapon ang resolution sa konseho nga gipangamahanan ni Jun Pe nga nagsuspenso sa mga development sa amihanang bahin sa dakbayan tungod sa suliran sa trapiko.

Apan gihulagway ni Atty. Pablo John Garcia nga usa ka lakang paghostage sa probinsiya aron mapugos pagtugot sa land swap. Apan matud ni Garcia nga baliktad hinuon ang mahitabo niini.

Ang problema sa maong tinguhang land swap mao ang mga panglawgaw ug pag-apil sa mga tawong wa gyud untay labot sa negosasyon. Human na nila hatagi og pagtugot ang duha ka mga chief executives busa nahuman na ang ilang parte niini.

Angayang likayan sa mga sakop sa konseho ug sa provincial board ang pagluwat og bisan unsang mga pamahayag o ba kaha lakang nga makadaot sa negosasyon ug posibling sabton nga dili sinsiro ang usa ka habig sa pagpakigsabot.

* * *

[email protected]