Dautang impresyon sa gawas

Ang nahitabong pagpamusil sa usa ka estudyanteng Koreano usa ka dautang mensahe ngadto sa ilang nasud ug sa ubang mga nasud sa Asya nga tigpadalhan og ilang mga nasyonal isip turista dinhi sa Sugbo.

Walay laing impresyon nga matisok sa ilang alimpatakan: dili luwas suroyan ang Cebu tungod sa presensiya sa mga kawatan nga mamusil sa ilang biktimahon.

Kanus-a pa man molihok ang kapolisan pagsulbad niining mga pagpanulis sa kadalanan?

Unya na og adunay laing Young Suk Jeon nga mapusilan? Unya na og adunay mamatay?

Daghan na ang mga biktima nga gipamatay sa mga karahong mga kawatan sa kadalanan. Mga armado pa ra ba gyud kini sila.

Wala pa gyud kita makadungog og konkreto nga aksiyon gikan sa acting director sa Cebu City Police Office unsay iyang lakang niining mga naglaaglaag nga mga tulisan nga de motorsiklo.

Pun-an pa niining mga fraternity nga magpunay lang og pinusilay sa mga lugar nga suroyanan sama sa mga concert ug diskohan, wala nay langyaw pa nga gustong magsuroy kay hadlok mapagan o tuyoan.

Bisan gani kaming mga nangaraan na dinhi sa Sugbo hipangtugkan og hubag-hubag sa kahadlok nga mosulod sa mga lugar nga kasagaran ig-an nianang mga tabaghak nga tulisan.

* * *

POSTER AREA. Ang Commission on Election mihimo nga common poster area sa barangay hall ug mga sports complex. Kun walay barangay hall o sports complex, mahimong magpapilit og mga posters ang mga kandidato sa kamerkaduhan.

Apan nagduda ko nga dili gihapon kini masunod tungod kay adunay mga supporters sa mga politiko nga gahi gyud og ulo, magpatuyang lang og papilit sa mga campaign posters.

Pila na ka eleksiyon ang nakalabay nga wala gyud matuman ang common poster area?

Mao usab kini ang atong kahibudngan nganong supakon gyud ang regulasyon sa Comelec nga alang man unta kini sa kaayuhan natong tanan ug sa mga kandidato.

Sa ingon nga paagi, mahatagan og patas nga panag-atbang tungod kay dili man kini makapatuyang og pakatap sa ilang mga poster nga gamiton sa kampanya. Sa laktod, mabahinbahin ang usa ka common poster area alang sa tanang kandidato.

Dinhi man gud sa ato, nahimo nang sukaranan sa kasikat o kasapian sa usa ka tawo ang poster.

Kun daghan na gani kaayo og poster nga ilaray gyud og papilit lukop entero paril, makaingon dayon kita "dato gyud ning tawhana," "daghan ni'g kuwarta."

Unya'g diyutay ug daginoton gani kaayo ang posters, ingnon dayon "makadaog ba kaha ning kandidatoha."

Apan maayong masayod kita nga dili sukod sa pagka-maayong opisyal ang posters.

Mag-unsa man nang daghan kaayo og gipapilit nga poster unya kun makadaog, manikas ug mangurap pag-ayo ang politiko kay aron mabawi ang nagasto sa mga posters?

Mga tawo gihapoy pilde!

* * *

PAMUG-OK. Dili madala sa blackmail ang mga kandidato pagka-senador aron hadlukon nga dili suportahan sa One Cebu Party ni Gobernador Gwendolyn Garcia kun dili mobabag sa bisan unsay lakang sa lehislatura pagpikaspikas sa lalawigan sa Cebu.

Sa pamahayag ni Garcia sa isyu sa The Freeman kagahapon, migawas na hinuon nga mas nagkinahanglan ang mga kandidato sa pagka-senador sa One Cebu kay sa One Cebu nagkinahanglan sa mga kandidato-nasyonal.

Dako ko'ng supak sa Sugbuak tungod kay nagtuo ko nga maghatag lamang kini og dautang resulta alang sa mga Sugbuanon sama sa nahitabo sa Zamboanga Sibugay nga wala na hinuon makasabot ang mga tawo unsa nay nahitabo nila ug asa sila nahisakop.

Ang Sugbuak igo lang mohatag og kaayuhan sa pipila ka mga politiko nga nahadlok mawad-an na og hurisdiksiyon ini og human sa ilang termino.

Apan, dili maayong gamitan og blackmail ni Garcia ang pagkampanya niya batok sa Sugbuak. Usa kini ka desperada nga lakang ug makahatag na hinuon og "hint" sa mga magbabalaod sa kaluag sa suporta sa mga Sugbuanon sa Anti-Sugbuak ug ang walay puas nga pagpanalipod sa mga Garcia sa ilang interes.

* * *

TEXT. Nakadawat ko og text message gikan sa nagpailang si Atty. Pablo John Garcia, ug mihatag og katin-awan sa gihisgutan natong deadline pagpangrehistro sa mga partido politikal.

Sumala pa niya nga ang deadline nga akong gihisgutan ma-aplay lamang sa mga partido nga mosalmot sa party-list system.

Migawas usab karong adlawa sa Banat News ang pamahayag sa Comelec nga mahimo pa'ng marehistro ang One Cebu Party nga gipamunoan karon ni Gob. Garcia.

Nagpasalamat ko ni Atty. Pablo John nga gihatagan kita og katin-awan aron mapasabot usab kamong mga magbabasa ning Tikdol sa Pordoy sa tinuod nga unod niadtong Comelec Resolution nga atong gihisgutan niadtong Lunes.

Daghan salamat, attorney!