Ang partidong politikal

Ang partidong politikal usa ka kahugpungan sa matag usa o grupo sa matag usa nga nagduso og prinsipyo o patakaran nga ilang gitoohan nga mas maayo kay sa uban alang sa pagpadagan o pagdumala sa kagamhanan.

Ang partidong politikal usa ka kahugpungan nga giporma sa katawhan nga mitoo sa samang idiya o mga idiya ug gusto nga kining maong mga idiya dawaton sa bagang katawhan. Mopadagan kini og mga kandidato sa bugnong lugaynon aron kini mapili aron ang iyang mga idiya o plata porma de pang gobiyerno mapatuman.

Ang partidong politikal lahi sa ubang kahugpungan tungod kay mosuporta siya og mga kandidato alang sa usa ka opisinang politikal. Usa sa mga feature sa partidong politikal mao ang pagtuboy og kandidato.

Isip kahugpungan, ang partidong politikal aduna kini upat ka mga tumong: Una, nga mapili ang iyang miyembro sa opisina sa gobiyerno; ikaduha, paghatag og ganti sa iyang mga miyembro ug sumusunod; ikatulo, pagpuno ug pagdugang sa iyang gahom; ug ang ikaupat, mao ang pagpataas pa sa iyang kinabuhi.

Ang partidong politikal makahimo sa pagkontrolar sa pagpadagan sa gobiyerno kon kadaghanan sa mga midaug nga kandidato iya nga miyembro o ka partido. Apan lahi ang atong nakita karon sa mga partido ug sa iyang mga miyembro dinhi sa Pilipinas. Ang mga partido dinhi sa nasod daw way mga prinsipyo ug baruganan, ug kon aduna man, wa kini sunda sa iyang mga miyembro. Sigon sa atong nakita, ang mga miyembro sa partidong politikal wa magdala sa mga prinsipyo ug mga idiya niining gibarugan. Maoy gidala sa mga miyembro niini ang kaugalingon lamang interest ug dili ang interest sa partido. Mao kini ang hinungdan kon nganong ang iyang mga miyembro murag mga alibang-bang nga bisan asa lamang motugpa. Pipila ka mga miyembro sa partidong politikal ang nagpa miyembro niini dili tungod kay mitoo siya sa idiya o prinsipyo niining gibarugan kon dili tungod kay convenient kini para kaniya. Ang partido dinhi sa nasod gihimo lamang sakayan sa mga tawo o mga miyembro nga gustong makaabot sa iyang gustong kab-uton og dili tungod kay gusto niyang mahatagan og katumanan ang idiya o prinsipyo nga gibarugan sa iyang partido. Mao kini ang hinungdan nganong nakapili kita o makapili unya kita og mga kandidato nga way mga baruganan o prinsipyo.