Pamolitika ug pagtuman sa lagda

Way dautan ang pagtuman sa lagda sa Commission on Audit labi pa kon pagprotehir sa kaban sa gobyerno ug sa kwarta sa katawhan maoy ipatigbabaw.

Apan unsaon man paglikay nga di mahatagan og bulok politika ang mga lakang nga sama sa gihimong pagpugong ni Mayor Thadeo Ouano sa suholan sa mga opisyal sa konseho aron kuno pagbawi sa P6.19 milyones nga overpayment sa sweldo sa mga konsehal sa Mandaue nga natigom sukad pa niadtong 1998.

Si Mayor Ouano mipasabot nga way bulok politika ang iyang gihimo ug igo lang niyang gituman ang mando sa COA. Uyon ko sa lakang sa mayor nga angayang sundon ug tumanon ang mando sa COA, angayan gyong pabayron ang mga konsehal nga nagkolekta og sobrang suholan gikan sa dakbayan sa Mandaue.

Apan angayan sab niyang iesplikar kon nganong karon lang niya kini gihimo kon ang maong kantidad natigom sukad pa diay niadtong 1998 aron pagtagbaw sa mga pangutana sa publiko ug pagpapas sa pagduda nga pamolitika ang iyang gihimo.

Ang labing bug-at nga mga sukaranan sa pagduda nga pamolitika ug pagpanggukod ang gihimo ni Ouano mao nga labing minus duha ka mga sakop sa konseho nga apektado lakip ni bise mayor Amadeo Seno ug konsehal Jonas Cortes ikaatbang sa iyang anak nga si Jonkie pagkamayor sa umaabot eleksiyon.

Laing sukaranan nga politically motivated ang maong lakang mao ang timing. Angayang ipasabot og maayo ni Ouano ngadto sa publiko kon nganong karon lang siya nakahukom pagpatuman sa rekomendasyon sa COA nga sukad niadto pa man ning 1998 nagsugod.

Nagtoo ko nga kon maesplikar og maayo sa mayor ang iyang kalangan pagsunod sa lagda sa COA ug ang iyang pagpaabot nga moabot ang eleksiyon una niya sundon, posibling abibahan siya sa mga Mandawehanon inay nga kayugot ang iyang maani. Apan ang dakong pangutana kon unsaon ni pagpasabot niya nga di siyang kapasanginlang namolitika.

* * *

Laing pasangil karon nga gibato kang Ouano mao ang iyang pagpanggukod sa mga kawani nga supporters sa ilang kontra. Apan si Ouano miingon nga gitumong ni aron paglimpiyo sa dakbayan gikan sa mga tapulan nga mga kawani.

Dalaygon ang maong lakang kon seryoso ang mayor sa iyang intensiyon paglimpiyo sa City Hall gikan sa mga 15-30 nga mga kawani. Apan angayang siguroon ni Ouano nga ang mga gitaktak mga tapulan gyud nga kandidato ug dili supporters sa iyang kontra sa politika.

* * *

[email protected]