Ihi sa ilaga

Matag karon ug unya, makasinati kita og pag-uwan-uwan. Dayon mobanaw ang tubig diha sa mga lim-aw ug anha sagad magduwa-duwa ang mga bata.

Daghang mga ginikanan nga dili lang magtagad sa ilang mga anak nga magduwa diha sa maong mga lim-aw. Wala man god sila masayod nga posible nga matakboyan kini og makamatay'ng sakit.

Ang ihi sa ilaga nga posibleng moagos paingon sa naglim-aw nga tubig, makadaut sa mga tawo, ilabi sa mga bata, kon magduwa-duwa sila sa tubig ug duna sila'y samad.

Sa miaging tuig, 11 ka tawo sagad mga bata ang nangamatay tungod sa leptospirosis, ang sakit nga resulta gikan sa ihi sa mga ilaga.

Kaniadtong 2005, upat lang ka tawo ang namatay dinhi sa dakbayan tungod sa leptospirosis. Sa akong pagtimbang-timbang, dali ra kining malikayan kon dili ka lang magduwa sa lim-aw.

Unsaon, dunay uban nga magsinilas lang, unya kon makaagi og tubig nga naglim-aw, moubog dayon kay manghugas sa ilang tiil, pastilang hugawa ug peligro.

* * *

Kamo usab nga mga hilig kaayo mokaon og mga sinugba nga nukos, mga sisi, angay'ng magbantay.

Nahibaw-an na nga ang nahitabong pagka-ospital niadtong mga entertainers alang sa mga Asean leaders nga mitambong og summit dinhi sa Sugbo, tungod diay sa bahaw nga sinugbang nukos.

Tambag sa mga city health officials nga mas labing maayo g'yod nga human og luto sa mga sinugbang nukos, kan-on kini dayon aron dili matakboyan og kagaw.

Ang kagaw nga gitawag og vibrio parahaemolyticus abtik kaayo motapot sa mga nukos nga bahaw na.

Husto ang tambag sa mga health officials dinhi sa dakbayan. Kinahanglan nga ang food caterers nga inyong kuhaon, kadtong nagbase duol sa venue nga himoan sa inyong tigum.

Kon may suki na kamo nga food caterer, mas labing maayo nga magbutang mo og dapit nga duol sa venue sa tigum nga adto sila makasugba sa nukos.

Kini aron nga samtang init pa, ma-serve dayon nga dili pa makatakboy ang kagaw.

* * *

Buyno, moundang na ta og hisgot anang mga isyu nga mora na hinoon ko'g doktor da.

Grabeha diay no? Miabot ang P13 milyones ang nakolekta sa City Traffic Operations Management nga multa gikan sa mga tag-iya og trisikad nga ilang nasakpan sa miaging tuig.

Kapin man sa 13,000 ka dakop ang nahimo sa mga sakop sa Citom task force mao nga kay tag P1,000 man ang multa sa matag dakop, miabot ang tanan og P13 milyones.

Apan mao lagi, daghan lang gihapon kaayong mga trisikad nga nagsamok-samok sa mga motorista diha sa kadalanan. Unsaon, hinay ra ang kampanya sa Citom batok sa mga trisikad.

Ang mga opisyal usab sa kabarangayan nga anaa kining maong mga trisikad mag-operate, nagmata lang og buntag ug nagsiga ang mata nga mora lang og wala makakita.

Ambot unsay gihimo nila ni Labangon barangay captain Felix Abella sa mga trisikad nga mosugat pa sa mga motorista diha sa Salvador ug Katipunan?

Naa usab kini sa dalan C. Padilla; Tomas Abella sa Taboan; Legaspi Extention, Port Area, Pasil, Suba ug daghan pa.

Walay mga political will pagpatuman sa mga balaod nga gihagoan sa pagmugna sa mga konsehal nato sa dakbayan. Unsa, hadlok mo nga dili makadaug sa umaabot nga eleksyon?

Maayo kaayo mo nga manumpa nga tumanon nako ang mga balaod, apan kutob ra diay sa tumoy sa inyong mga dila. Mga bakakon ug dili motuman sa mga saad.