Ang ilang pagsalmot sa bugnong lugaynon maoy nakahatag og dakong komide sa seryosong kumbati sa mga nag-unang kandidato. Apan sa katapusan maputol dayon ang ilang mga ambisyon tungod kay ideklara man dayon silang nuisance candidate sa Commission on Elections.
Kini tungod kay alang sa Comelec, mga kingkoy sila sa politikanhong entablado nga dili angay'ng seryosohon pagbotar sa katawhan gumikan sa daghang rason - kakulang sa makinarya ug balidong rason sa ilang tinud-anay nga misyon sa ilang kandidatura.
Sa nakalabay'ng eleksiyon, daghang mga kandidato pagka-presidente ang nakapaalegre sa bugnong lugaynon gumikan sa ilang mga saad nga lisud katuohan. Si Eddie Gil kaniadto misaad nga kun siyay modaug iyang papason ang utang sa Pilipinas sa daling panahon ug hatagan niya'g daghang salapi ang matag Pilipino.
Daghan ang nagtuo nga kuwartahan gayud si Gil. Apan sa diha'ng mibuto ang taho nga wala siya mibayad sa balayranan sa usa ka hotel sa iyang pagpangampanya didto sa Mindanao, daghan usab ang nagduda nga panglawgaw lamang ang kandidatura ni Gil.
Si Ely Pamatong puwerte nakapanghambog nga kun siya ang mapresidente, iyang ipasakop dayon ang Pilipinas ilalum sa Amerika. Apan nakita sa Comelec nga kulang siya sa makinarya alang sa pagpangampanya hinungdan nga gideklarar siya sa komisyon isip usa sa mga nuisance candidates.
Tungod sa iyang pagkataktak sa listahan sa mga kandidato, iyang giposasan iyang kamot sa gate sa Comelec isip protesta. Sa iyang kalagot, hasta ang mga motorista maoy iyang gipahimongtan sa dihang siya ug ang iyang mga batos ang giingong mipakatap og mga suyak sa kadalanan sa Manila.
Usa usab sa mga intresado mag-presidente nga giitsapuwera sa Comelec isip nuisance candidate mao si Lope, ang labing unang kandidato pagkamayor sa dakbayan sa Sugbu sa umaabot nga piniliay.
Si Lope gikatahong miduso sa iyang sertipiko de kandidatura alang sa 2004 presidential elections. Apan gitangtang siya sa listahan sa mga kandidato gumikan kuno sa iyang pagka-nuisance candidate.
Gani, giingnan kuno si Lope ni Comelec chairman Benjamin Abalos nga "maghanap ka na lang ibang paraan para makaserbisyo sa bayan."
Niining pagkandidato ni Lope pagkamayor sa dakbayan, insakto kaha siya sa makinarya alang sa pagpangampanya sa mga kabaranggayan? O basin usa na usab siya sa mga kandidato nga tuyo lamang ang panglawgaw sa lokal nga bugno'ng lugaynon.
Hinuon mora'g desidedo gayud si Lope nga magmayor sa dakbayan tungod kay halos kada adlaw siya'ng mobisita sa mga estasyonan sa radyo ug television ug mga opisina sa mga pamantalaan alang sa pagpahibalo sa iyang kandidatura.
Apan sa akong tan-aw, mora og walay ikabuga nga makinarya si Lope panahon sa kampanya nga basin unya kun ideklara na usab siya sa Comelec isip usa ka nuisance candidate.
Kun sakto akong pangagpas, dili ba kaha usa na usab si Lope sa mga kingkoy sa umaabot nga bugnong lugaynon?
(Ipadala inyong reaksiyon sa yacilam@yahoo.com)