Nakuotan og wallet

Gikan sa cellphone no. 0919-7510402: "Good day, Sir. Naa koy ireklamo bahin dinhi sa Pier 4 kay pag-abot nako dinhi gikan sa Nasipit nakuotan ko og wallet. Daghan diay mangunguot dinhi sa Pier 4. Wala diay mga police nga nagbantay dinhing dapita? Daghang nagreklamo, dili lang ako. Daghan pa gyod mga mangingilad. Nganong wala ma-control sa kapolisan sa Cebu kanang dapita? Sa Mindanao daghan mahadlok moanhi sa Cebu tungod kay ilado ang pantalan sa Cebu nga daghan og mangunguot ug mangingilad. Unta mahatagan og solusyon ning problema sa mga pantalan sa Cebu. Daghang salamat." -- (January 11, 2007 -- 10:08:18)

Daghang salamat sa imong text, higala. Tinuod bitaw ang imong giingon nga daghan kaayong mga badlongon diha sa mga pantalan sa Cebu, dili kay sa Pier 4 ra. Dili pod maahom sa pagbantay sa mga polis ang tanang badlongon sa katilingban tungod kay kulang man sa kadaghanon ang kapolisan sa Cebu. Mao man gani kini ang hinungdan nga nanguha kita'g augmentation force sa nakalabay nga ASEAN Summit. Gawas pa, ang mga polis ra usab maoy bantayan sa mga badlongon maong dili sila masakpan.

Kon bahin na gani sa mangingilad ug mangunguot, dili na malalis nga usa sa dapit diin naglihok kining mga tawhana mao ang pantalan. Pero in fairness sab ngadto sa mga Sugbuanon, dili baya tanang mga mangingilad ug mangunguot diha, taga Cebu gayod. naay mga mangunguot ug mangingilad nga taga amo sa Bohol, taga Leyte ug uban pang kaprobinsiyahan nga sa Cebu lang nagpasalir sa ilang tinonto. Lisod gyud kontrolahon sa kapolisan kining maong mga badlongon sa katilingban ilabi na kay ang mga biktima dili man sab mopasaka og kiha batok nila. Igo na man alang sa mga biktima nga mahibalik kanila ang ilang kuwarta ug butang nga gikuot o giilad. Mao nga magpabiling gawasnon ang mga mangunguot ug mangingilad ug makapadayon gihapon sa pagpasalir sa ilang modus operandi.

Ang labing maayong buhaton sa katawhan, kini isip tabang na lang usab nato ngadto sa kapolisan, mao ang dobleng pag-amping aron makalikay nga dili mabiktima sa panguot ug pangilad. Nasayod na man gayod kita nga daghang mangunguot ug mangingilad sa Cebu, partikular na diha sa pantalan, dili na lang kita mokompiyansa.

* * *

(Sumbong ug reklamo? Text sa 0910-8105522)