Kusog manigarilyo

Kining pagpanigarilyo sa mga publikong lugar ug ingon man sa mga PUJ angay gayod untang estriktohon sa pagdili. Sa tinuod lang, dili gayod angay manigarilyo ang usa ka tawo diha sa mga dapit diin may laing mga tawo nga magsaoysaoy ug makahanggap sa aso gikan sa iyang sigarilyo. Ilabi na gayod kon anha sulod sa sakyanan o PUJ. Dili baya tanang tawon ganahan sa baho sa aso sa sigarilyo.

Dugtong niini, nakadawat kog text nga nagkanayon: "Maayong adlaw, Sir. Naa lang koy reklamo bahin sa PUJ diri sa Inayawan nga 11-A route. Kusog kaayo nga manigarilyo ang driver ug conductor. Masuko ra ba kon badlongon. Kinsa man ang manakop nila nga under city ordinance 990 man unta ni? Palihog kog paabot sa nahingtungdang ahensiya. Daghang salamat." -- 0919-2505492 (Dec. 27, 2006 -- 13:30:56)

Lehitimo kining imong reklamo. Na-involved man god niini ang panglawas ug safety sa katawhan. Kay klaro man kaayo nga ang pagpanigarilyo dangerous sa atong health sumala sa pasidaan pod sa mga advertisement sa sigarilyo mismo. Active o passive smoker ka man, kuyaw gayod kini sa panglawas.

Ang active smoker mao kanang nanigarilyo mismo. Ang passive smoker mao kanang nakahanggap sa aso sa sigarilyo gikan sa tawo nga nanigarilyo. Ang publiko maisip nga passive smoker kon adunay usa ka tawo nga uban nila nga nanigarilyo. Niini nga sitwasyon, nameligro pod ang ilang panglawas sa kadaot nga ikadulot sa sigarilyo.

Subo lang kaayong hunahunaon nga adunay daghang mga hinigarilyo nga walay pagpakabana sa uban. Magpataka lang og pabuhot sa aso sa ilang sigarilyo. Labi na gyud kanang mga driver ug konduktor. Dili kay kanang mga driver ug konduktor sa mga PUJ nga nagrota og Inayawan ray naghimo niini kondili hapit tanang mga driver ug konduktor sa PUJ. Unya masuko ra ba kon badlongon. Pagka walay batasan!

Ang maayo nimong buhaton mao nga i-refer kini nimo ngadto sa konseho sa dakbayan ug magpakisayod ka kon kinsa ang konsehal nga ang komitiba mao may hurisdiksiyon niini. Maayo unta kadto kon natiman-an nimo ang plate number sa maong PUJ aron sayon ra kining subayon. Mas maayong magpakabana gayod kita aron mapitol kining aroganteng mga driver ug konduktor nga kusog manigarilyo sa walay pagpakabana nga dili gusto niini ang ilang mga pasahero.

* * *

(Sumbong ug reklamo? Text sa 0910-8105522)