EDITORYAL - Paminawon ang awhag sa Arsobispo

Sa iyang wali nga gihimo sa misa nga iyang gisaulog alang sa kapistahan ni Sr. Santo Niño, si Arsobispo sa Sugbo Ricardo Cardinal Vidal miawhag sa mga Sugbuanon sa pag-ila sa Sinulog festival nga usa ka debosyon ngadto sa Senyor dili lang kay usa ka atraksyon sa mga turista.

Nakahimo sa maong awhag ang tinamud tang Arsobispo tungod tingali sa iyang naobserbahan nga ang Sinulog nahimo na nga kalingawan sa katawhan ug nalimtan na ang katuyoan niini nga mao ang paghatag og pagyukbo ug pagtahod ngadto sa balaang Bata.

Kaniadto ang Sinug gihimo sa mga Sugbuanon diha sa Basilica ug sa ubang simbahan diin adunay nanimba nga deboto ni Sr. Santo Niño. Solemne kaayo ang maong pagsayaw sa sinug ug naa pa man gani pipila ka deboto nga nagpatu sa ilang luha samtang nagsayaw.

Karong panahuna, gihimo na ang pagsinug nga usa ka atraksyon alang sa mga langyaw nga turista. Ang kabililhon ug ka solemne niini morag natabunan na sa mga hinugyaw sa liboan ka mga nanambong sa gitawag nga Sinulog mardi gras.

Among gipaluyuhan ang awhag sa atong mahal nga Arsobispo uban ang panghinaut nga dunggon kini sa tanang Sugbuanon.