Dunot nga sistema's hustisya

Dakong palpak sa kampanya sa gobyerno batok sa negosyo sa gidiling drugas ang gidangatan sa mga "whistle blower" batok sa managsuong Peter ug Wellington Lim.

Tungod sa gidangatan nila ni Ananias Dy ug Bernard Liu ambot og duna pa ba kahay mga tawo nga ganahang motabang sa gobyerno sa maong kampanya kon mismong ang atong gobyerno pakyas pagproteher nila ug ang labing sakit mao nga gawas nga gipatay ang usa nila, karon ang nahabiling usa gigukod na hinuon sa gobyerno nga iyang gitabangan.

Ang vice chairman sa House committee on dangerous drugs, kongresista Antonio Cuenco, admitado nga dakong setback sa kampanya sa gobyerno ang nahitabo una ni Dy ug karon ni Liu.

Kon mahinumduman, si Dy gipatay sa wa pa mailhing mamumuno niadtong Hulyo diha sa barangay Labangon. Wa lang mapakyas ang atong gobyerno pagpanalipod niya human sa iyang pagtabang isip testigo atol sa imbistigasyon sa kongreso batok sa giingong mga negosyante sa illegal nga drugas, pakyas pa gyud ang gobyerno hangtud karon paghatag og hustisya sa iyang gidangatan.

Hangtud karon ang kapolisan wa pa gyung kasulbad sa pagpatay ni Dy, bisan pag-ila na lang kun kinsay nagbanhig niya way nahimo ang gobyerno.

Wa pa gani masulbad ang gidangatan ni Dy, karon ang laing saksi na pod nga si Liu maoy nabutang sa apiki. Kini human siya dakpa sa mga sakop sa CIDG niadtong Martes sa buntag didto sa barangay Lahug tungod sa kasong illegal importation of drugs.

Ang kaso tungod ni sa iyang pag-angkon atubangan sa kongreso nga nagdala siya og drugas dinhi sa Pilipinas gikan sa Hongkong ubos sa mando sa iyang kanhi mga agawon nga ang managsuong Lim.

Apan inay nga ang managsuong Lim maoy gukdon ug taralon sa hukmanan, si Liu nga saksi maoy gikiha sa Department of Justice pinaagi ni kanhi Secretary Simeon Datumanong.

Ang nihulip ni Datumanong nga si kanhi acting DOJ secretary Merceditas Gutierez nga karon mao nay Ombudsman mipaka-way bili sa unang resolution ni Datumanong, apan awahi na kay nasang-at na ang kaso didto sa korte.

Gisuwayan unta og withdraw sa piskaliya ang kaso, apan wa nang madala si Judge Fortunato De Gracia.

Ang laing duha ka huwes hinuon nga sila si Meinrado Paredes ug Gabriel Ingles diin didto poy laing susamang kaso sa ilang sala batok ni Liu misanong sa awhag sa piskaliya nga ibasura ang kaso tungod sa kakuwang og ebidensiya.

Pangagho sa dakong pagmahay sa iyang pagtabang sa gobyerno mao na lay bugtong nahimo ni Liu tungod kay ang sukli sa iyang pagpakabana mao man ang iyang kaalautan ubos sa landong ning kurakot ug dunot tang sistema sa hustisya.

Si Cuenco nga maoy mipresentar ni Liu ug Dy atol sa hearing sa iyang komitiba kaniadto misaad hinuon nga sila maoy mogasto sa abogado nga molaban ni Liu. Swerte pa hinuon kon buot huna-hunaon si Liu kon itandi sa iyang kauban nga si Dy tungod kay duna pa may purohan nga siya maabswelto sa kasong iyang giatubang, apan si Dy wala na gyuy kahigayonan nga mabuhi bisan pag hutdon ni Cuenco og bayad ang tanang abogado sa tibuok kalibutan.

Hinaut nga sama sa iyang gihimong pagtabang karon ni Liu pit-on pod ni Cuenco ang kapolisan nga sulbaron ang pagpatay ni Dy sa labing daling panahon.

* * *

[email protected]