Walay Sugboanong mag-senador

Lubog pa kaayo ang dagayday sa tubig sa politika pagsuta niining panahona kun may Sugboanon ba nga modagan pagka-senador.

Mismo ang nangaraan na sa Senado nga si Senador John Osmeña, wala pay klarong modagan pagka-senador, tingale nakakaon na og tagam nga napilde sa miaging eleksiyon.

May milutaw hinuong mga ngalan nga makarga sa administrasyon ug usa niini si Sec. Cerge Remonde sa Presidential Management Staff. Nakadungog ko'g estorya nga atol sa budget hearing sa Senado, mismong si Senate President Franklin Drilon mitawag kang Remonde og "Senator Remonde" tungod sa lawom nga pagtuong ikarga si Remonde sa line-up sa administrasyon.

Gawas kang Remonde, wala nay laing Sugboanon nga gi-float alang sa senatorial line-up sa administrasyon.

Sa inisyal nga tigumtigum sa administrasyon, migawas ang mga ngalang Sonny Alvarez, Gina de Venecia nga kapikas ni Speaker Jose de Venecia Jr., Gilberto Teodoro, Ralph Recto, Manny Villar, ug taga Bukidnon nga si Kongresista Juan Miguel Zubiri.

Nindot unta kaayo kun aduna kitay Sugboanon nga representante sa Senado nga maoy makadepensa sa interes sa mga Bisdak sa mga butang nga tukion sa Senado nga makaapekto kanato.

Apan, si Remonde nga bisan sa iyang pagka-kalihim sa PMS, ang buhatan diin anha hikutahon ang mga lakaw sa presidente, mga appointments gikan sa presidente, sa iyang pagka-hepe sa Infrastructure Monitoring Task Force ug sa pagsuperbisar sa Presidential Social Fund (PSF), pabilin siyang "low-profile" nga usa ka timailhang isalikway ra gihapon niya ang tanyag pagdagan pagka-senador.

* * *

AMERIKANO. Wala idayon og pasaka ni Atty. Inocencio dela Cerna ang iyang gibahad nga mga kaso batok sa ka sa Amerikano nga nag-abang og luna sa edipisyo nga iyang gidumala diha sa dalan Sanciangko.

Sa wala makaila ni dela Cerna, siya ang legal consultant sa Criminal Investigation and Detection Group 7.

Si dela Cerna mibahad ni Robert Browning, usa ka Amerikano nga nag-operate og internet café sa Villacampa-Capuras Building sa Sanciangko, nga pasakaan og kasong grave threats, grave oral defamation, malicious mischief, ug damage to property.

Ang plano ni dela Cerna gipagawas sa media nga wala gani kakuhai og pamahayag si Browning. Mao intawon kini ang napangluoran sa Amerikano nga bisan sa iyang pagbubo og puhonan dinhi sa Cebu, nabaslan siya og dili maayong kasinatian.

Sumala pang dela Cerna sa iyang affidavit nga P20 mil ang naangkong kadaot sa iyang opisina tungod sa pagpanghasi ni Browing. Kun nanghasi si Browning sa buhatan mismo ni dela Cerna, siyaro og wala gyud siyay nahimo aron mapugngan ang pagpanghasi. Dili kaha na nimo pusilon ang tawong naa manghasi sulod mismo sa imong opisina?

Nganong naabot man og P20 mil ang kadaot sa opisina? Gipasagdan ra diay'ng makapanghasi si Browning?

Si Browning mi-esplikar nga igo lang siyang miadto sa buhatan ni dela Cerna aron hangyuon kini nga magpatunga sa ilang away tali sa laing tenant sa building nga si Atty. Ed Gobonseng nga iyang gikalalis mahitungod sa banner nga gi-display gawas sa building nga nakaali sa banner sa abogado.

Ang laraw ni dela Cerna nga ipadeklarar nga undesirable alien si Browning makahatag kini og kahadlok sa ubang mga negosyante. Si Browning kapin na sa usa ka tuig nga nag-negosyo nga wala gyuy gikaaway ni problema sa mga buhatan sa gobyerno.

Si Browning gialegar nga mibahad nga patyon si dela Cerna unya miingon pa nga "You Filipinos are stupid monkeys!"

Makaako kaha si Browning pagsulti niini nga Pinay man ang iyang asawa? Kun nagtuo siyang mga unggoy ang mga Pilipino, unggoy diay iyang asawa?

* * *

IPAIHAW. Gidakop kagahapon si Bernard Liu, ang mibarog nga testigos batok sa magsuong Peter ug Wellington Lim atol sa congressional inquiry tungod sa pasangil nga mga drug lords kini.

Pinasikad sa warrant of arrest nga giisyu ni Regional Trial Court Branch 50 Judge Fortunato de Gracia, gidakop si Liu sa mga sakop sa Criminal Investigation and Detection Group 7.

Ang kaso? Walay klaro!

Gibasehan sa pagpagawas sa warrant of arrest ang kasong gipasaka batok ni Liu nga mao ang kalambigitan niini sa operasyon sa ilegal nga drugas.

Ebidensiya? Walay klaro! Kadto lang testimoniya ni Liu atol sa congressional inquiry ang gibasehan sa piskal pagpasaka sa kaso ngadto sa korte, wala gani ebidensiyang nakuha gikan sa posesyon ni Liu.

Karon pa ko, ang kaso mi-prosper sa korte pinasikad lamang sa pagtug-an sa usa ka tawo nga mihimo siya sa ingon.

Unya, "covered" man unta isip "privileged" ang testimoniya ni Liu busa ang iyang gipanulti dili unta magamit isip ebidensiya batok niya.

Mao na ni ron! Ang testigos na hinuon ang gikasuhan ug gidakop. Ang gipunting sa testimoniya, ang magsuong Lim, pabiling gawasnon kay wala gyuy kasong gipasaka.

Susihon nako kun pila na ka tawong may kasong may kalambigitan sa ilegal nga drugas nga gikonbikto sa sala ni Judge de Gracia. Ambot pila kaha ka kasong may kalambigitan sa ilegal nga drugas ang gi-dismiss niya.

Nindot ni sundan ning kasuha.