Mingaw nga pagbiya

Ang pag-atubang ni Pres. Arroyo sa lokal ug langyawng mga sakop sa media human sa upat ka adlaw nga way hunong nga mga tigom kuyog sa iyang kaubanang mga pangu sa Asean ug East Asia maoy ganti sa iyang liderato sa Asean karong tuiga: Siyay gipasidunggan sa talagsaong kahigayonan pagpahibawo sa tibuok kalibotan unsa ang labing mahinungdanong mga kauyonan nga ilang nakab-ot.

Duna lay gamayng problema. Gisabotahe ang iyang opisyal nga pamahayag sa iyang kaugalingong tigpamaba nga si Ignacio Bunye. Kinsa nag-una-una pagbasa ug pag-apud-apod sa pamahayag ngadto sa media pila ka oras sa wa pang press conference ni Arroyo. Napakatap nang pamahayag bisan nagpadayon pang East Asia Summit (EAS). Human nag-una-una paghatag og ebidensiya sa "Hello Garci scandal" duha ka tuig nang nilabay, si Bunye na say naghatag sa labing klarong ebidensiya nga luto nang daan ang mga kauyonan sa summit.

* * *

Kon unsa kasadya ang pagsugat sa heads of state sa ilang pagtugpa sa Sugbo mao sab kamasulub-on ang pagpagikan nila sa Cebu International Convention Center (CICC). Mingaw ug bakikaw kaayo si Pres. Arroyo nga nagbinugtong pag-atang sa ilang pagawas sa ganghaan. Kay nag-ulhos-ulhos man pagpanggawas ang heads of state, may pila ka gutlo nga ang presidente rang usa ang nagbarug sa red carpet, napugos na lang paglingaw sa iyang kaugalingon sa paglakaw-lakaw, paghikap sa mga tanom ug pagtan-aw sa iyang mga kuko.

Human nilag lamano ni Arroyo, ang heads of state gigiyahan ni Ambassador Marciano Paynor ngadto sa mga sakyanan nga nagpaabot nila sa gawas. Pasayloa, apan ang nibathay sa ilang panagway di kadaogan sa kamahinungdanon sa mga kauyonan nga ilang nakab-ot kon dili ang kahinam nga makabalik na sa ilang mga nasud.

Sa solemneng pagbiya sa heads of state, nanghinaot ko nga gihambin sa ilang mga kasingkasing ang bisan gamay na lang kahinugon sa gugma ug katahom sa dapit ug katawhan nga ilang gitalikdan.

* * *

Samtang nanubag sa mga pangutana sa mga sakop sa media, si Pres. Arroyo nagsige og tan-aw sa iyang relo. Iya na diay tong timaan sa moderator nga si Ambassador Victoriano Lecaros nga ipahuman nang press conference. Dihang napakyas si Lecaros pagsabot sa iyang senyas, masuk-anon nag dyutay ang tingog sa presidente nga nideklarar nga usa na lang ka pangutana ang iyang tubagon kay molupad pa siya sa kaulohan aron dawaton ang state visit ni Chinese Prime Minister Wen Jiabao sa Malakanyang.

Di maayong tigpamaba si Arroyo sa summit. Wa tay laing mahimo gawas sa pagpangaliya nga mas takos siyang tigpatuman sa mga kauyonan nga gipasalig nga makahatag sa labing dakong kaayuhan ug mas malungtarung kalinaw ngadto sa labing daghan sa mga molupyo nga mao say labing kabos sa Pilipinas ug sa Asya.

* * *

Email: [email protected]