Papel sa Pilipinas sa counter-terrorism pact

Importanteng papel ang nakuha sa Pilipinas, ilabi na sa Cebu, sa ASEAN Convention on Counter Terrorism nga napirmahan sa 10 ka nasud nga sakop sa Association of Southeast Asian Nations.

Ang maong kasabutan nagsilbeng sinugdanan sa paghiusa sa puwersa sa kasanuran sa Asean pagpakigbatok sa terorismo ug ang Pilipinas maoy nagsilbing "jump off" point sa maong kampanya kontra terorismo.

Usa ang Pilipinas sa mga nasud sa Asean nga gihasi sa mga terorismong buhat sama sa pagpamomba nga mikalas na og libuan ka mga inosenteng sibilyan. Ikaduha ang Indonesia nga gikalasan usab og daghang kinabuhi sa dihang gibombahan ang Bali.

Dili lalim ang pagmugna og ingon ka dako nga kasabutan tungod kay ang mga nasud nga mosagop niini pinaagi sa "ratification" sa tagsatagsa ka kongreso kinahanglang mopanday og balaod nga sibo ug haum sa mga prinsipyo sa convention.

Gawas niini, ang mga tinugyanan sa balaod sa maong mga nasud kinahanglang adunay hiniusang plano ug kooperasyon aron ikapatuman ang gikasabutan sa mga nasud nga nagsagop nini taliwala sa tumang kasayon.

Ang labing importante sa tanan mao ang panagbayloay og intelligence informations. Kun wala kini, masayang lamang ang gikasabutan tungod kay kining maong elemento ang labing importante aron pagpuhag sa mga lungag nga giluklokan sa mga terorista.

Pabiling gisagop, sumala sa prinsipyo sa international law, ang "pacta sun servanda" nga usa ka doktrinang nagmando sa tanang nasud sa pagsunod ug pagtuman sa gikasabutan sa convention sa diniyos ug sa tarong nga paagi. Kining maong prinsipyo maoy mogapos sa tanang "signatory countries" pagsunod sa gikasabutan sa convention.

* * *

SIPYAT. Giangkon dayon sa Criminal Investigation and Detection Group 7 ang sipyat nga ilang nahimo pagronda sa balay ni Ustadz Najib Rasul didto sa Minglanilla, pinasikad sa search warrant nga giisyu ni Regional Trial Court judge Geraldine Faith Econg.

Mi-react si Rasul sa pagpangronda nga gihimo sa mga elemento sa CIDG-7 tungod kay matud pa gitratar siya nga sama og hayop atol sa ronda, nga dali usab nga gihimakak ni CIDG-7 Chief Jorge Corpuz.

Ang balay ni Rasul gironda sa CIDG-7 tungod kay matud pa nagtinil kini og mga eksplosibo ug mga armas.

Seryoso ang pasangil ni Rasul busa nagkinahanglang adunay ilusad nga imbestigasyon ang Commission on Human Rights pagsuta sa kamatuoran sa gisulti sa lider sa mga Muslim sa Minglanilla.

Karon nga wala pay pormal nga imbestigasyon, pabilin ang "presumption" nga gilusad sa CIDG-7 ang pagpangronda pinasubay sa tukmang lagda, gawas lang kun makapresentar si Rasul og mga ebidensiya ug mga testigos pagsuporta sa iyang pasangil batok sa mga polis.

Mismo si Police Regional Office 7 Chief Silverio Alarcio Jr. miingon nga dili angayang mapakasala ang CIDG-7 sa maong sipyat nga pagpangronda. Si Alarcio miangkon nga ang impormasyon nga gibasehan sa CIDG-7 paglusad sa operasyon naggikan mismo sa Camp Crame.

* * *

LIKAY. Nangangkon si Corpuz nga tungod sa nagpadayong 12th Asean Summit mao nga ilang giaksiyonan ang impormasyon nga ilang nadawat batok ni Ustadz Najib Rasul.

Kun isumpay nato ang pangangkon ni Alarcio nga gikan mismo sa Camp Crame ang impormasyon nga gibato ngadto sa CIDG-7, dili ko makatuong gi-operasyonan dayon sa CIDG-7 ang balay ni Rasul nga wala mag-agi sa proseso sama sa pagpa-ubos sa surveillance sa iyang balay ug pagtan-aw kun may "probable cause" ba nga ilang mahatag ngadto ni Judge Econg ini'g pangutana sa aplikante sa search warrant ug sa mga testigos nga ipresentar niini.

Dili lalim ang trabaho sa huwes sa dili pa mo-isyu og search warrant tungod kay kinahanglang sundon niini ang lagda nga nalatid sa Konstitusyon sa pagpang-isyu og search warrant ug warrant of arrest, sama sa personal niyang pagdeterminar sa probable cause pag-isyu niini.

Karon nga nahimo ang palpak, ang pangutana may atubangon ba ang kapolisan nga "liability"?

Depende na kana ni Rasul.

Apan, kun akoy si Rasul maayong ibutang na lang nato nga "dili makalimtang kasinatian" ang maong panghitabo.

Igo na nga "justification" ang Asean summit sa maong sipyat.

Gani, maayong malipay kita nga midagan ang kalihukan sa mga Asean countries dinhi sa Cebu nga walay labad sa ulo sa mga tinugyanan sa balaod ug sa mga organizers, bisan sa ulan-ulan.

Makapasalamat kita og dako nga walay mga insidente nga makapakurat sa mga delegado nga ania karon dinhi.