Basa ug tugnaw

Bisan sa atubangan sa Cebu International Convention Center (CICC), dunay pipila ka decorative lamps nga wa magsiga. Ang pagpanghulga sa Department of Public Works and Highways (DPWH) pagsilot sa mga kontraktor napakyas pagpahiyos sa sibaw nga pagduda nga naalkanseng mga magbubuhis sa P95,000 nga nagasto sa matag poste. Bisan si PNP Chief Oscar Calderon nakakita sa nag-ulpot-ulpot nga mga hulagway sa gikahadlokang overpirced sab nga surveillance cameras nga maoy sukaranan sa kasong plunder batok sa DPWH. Duha lang ni sa labing dagkong mga eskandalo nga nakapasibaw sa pasangil nga gibolsa ang dakong bahin sa binilyon ka pesos nga gahin sa summit.

* * *

Ang pangagpas sa Pagasa: Uwanon ang mga delegado sa 12th Asean ug 2nd East Asian Summits karon ug ugmang adlawa tungod sa ikog sa cold front nga nibalikos sa Luzon ug Kabisay-an. Tugnaw ang tibuok Sugbo, 22-27 degrees celsius. Unya na mopakita ang adlaw sa kataposang duha ka adlaw sa kalihokan, Dominggo ug Lunes, kanus-a mosaka ang temperatura ngadto sa 29 degrees celsius.

Ang kabasa ug katugnaw sa Sugbo, bisan mas subsob kay sa uwan ug hangin nga dala ni Seniang sa niaging buwan maoy labing gamay sa mga suliran sa mga tigpasiugda sa summit. Ang militar ug kapolisan niangkon na nga ang tulo ka sunud-sunod nga pagpamomba sa Mindanao, nga sa kataposang ihap nipatay na og walo, gitumong pagpakauwaw sa pagduma sa kagamhanan sa summit sa Sugbo. Nitataw hinuon sila nga di mahitabong makalusot ang mga terorista dinhi sa ato.

* * *

Gipagamay dayon sa mga tigpasiugda ang pagpalta sa pipila ka dagkong mga opisyal nga ilang gidapit alang sa summit. Mas hinay ang ilang tingog sa pagpahiyos sa mga implikasyon sa pasidaan sa pipila ka heads of state nga samtang manambong sila sa pagsugod apan di na sila motiwas sa summit.

Nipahibawo nang daan si Indonesian President Susilo Bambang Yudhoyono nga mobiya na siya sa Sugbo sa Dominggo sa buntag kay kinahanglang pangunayan pag-atiman ang mga biktima sa mga aksidente sa barko ug ayroplano ug sa uban pa nilang katalagman. Ang Japan nagdumili pa sab pagtino makatambong ba gyod si Primero Ministro Shinzo Abe, kansang biyahe paingon sa Uropa maoy usa sa giagad sa Pilipinas sa pagtakda sa bag-ong mga petsa sa summit.

* * *

Langyawng mga tigpaniid niisip dayon sa pagpalta nilang Yudhoyono ug ubang mga opisyal nga mga timaan sa pagkaluya tungod sa pagkauswag sa summit ug dakong kapildehan sa pangangkon sa mga tigpasiugda sa kalig-on sa kahiusahan sa 16 ka mga nasud sa rehiyon.

Apan kapanalipdan sab ang argumento nga mas mahinungdanon kay sa pagtambong sa tanang lider mao ang pag-umol sa kauyonan sa mas lig-ong kampanya batok sa terorismo, mas kusganong pagpanalipod sa katungod sa migrant workers, mas gawasnong pagpanarbaho sa mga nurses ug ang pagsugod na pagtuki sa gisugyot nga Asean Charter.

* * *

Email: [email protected]