Maayong pag-abot dinhi sa Sugbo

Ang nasudnon ug lokal nga komitiba nga naglihok sa ika-12 nga Asean Summit nga ipahigayon dinhi sa Sugbo misangpit na sa mga madre alang sa pagpangayo og tabang nga iampo ang kalampusan sa Summit. Maoy ilang gipangayo nga unta hatagan kita og maayong panahon ug kasiguroan sa maong kalihukan.

Dili lang seguro ang mga madre maoy sampiton sa komitiba aron magmalampuson ang atong pag-host sa Asean Summit. Mas maayo segurong sampiton usab niini ang tanang katawhan nga maghiusa sa pag-ampo aron makuha nato ang kalampusan sa maong dakong kalihukan nga anhi ipahigayon dinhi sa Sugbo.

Daghan man tuod nga naglagot niining atong pag-host sa Asean Summit kana gumikan kay naperwesyo sila tungod kay ang uban kanila nawagtangan og mga panimalay kay gipangguba kay hugaw kini sa panan-aw ngadto sa atong mga bisita. Apan niining panahona mas maayo seguro nga ato lamang unang ipadaplin ang atong mga kasuko ug mga kahiubos ngadto sa atong gobyerno tungod ug alang sa kalampusan niining maong kalihukan. Ato lamang unyang paninglan ang gobyerno pagkahuman sa Summit, dali ra bitaw tang makapaningil nila kay bugnong lugaynon na man pod. Kon wa ta makauyon sa ilang gihimo kanato kay maoy gipalabi sa gobyerno ang Summit di, silutan nato sila sa pag-abot sa bugnong lugaynon. Dili nato sila botaran! Pero sa pagkakaron suportahan lamang una nato ang gobyerno kay nakataya ra ba dinhi ang imahen sa Pilipinas ngadto sa mga mata sa kalibutan.

Tabangan ta ang atong gobyerno sa pag-atiman ug pag-abi-abi ngadto sa atong mga bisita bisan sakit sa atong dughan.

Sa among mga bisita, maayong pag-abot dinhi sa Pilipinas! Maayong pag-abot dinhi sa Sugbo. Tagamtama ninyo ang tam-is nga mga pahiyom sa mga Sugbuanon.

* * *

Ako diay nga gitawagan dinhi ang tanang graduwado sa Southwestern University nga aduna kitay Grand Alumni Homecoming karong adlaw nga Sabado, petsa 13 ning buwan sa Enero. Kining maong kalihukan adto ipahigayon sa Waterfront Hotel, Lahug ning dakbayan. Alang sa dugang kasayoran tawaga lang ang telepono numero 4155555 ug ikonek lang ngadto sa Alumni Affairs.