Sinabligay na'g isyu

Dili na mabangbang ang panagsinabligay og isyu sa habagatang distrito tali nila ni Kongresista Antonio Cuenco ug kanhi Cebu City Sports Commissioner Jonathan Guardo.

Si Guardo nanukad og taman aron lumpagon ang politikanhong karera nga napundar na ni Cuenco sa habagatang distrito tungod sa iyang plano pag-ilog sa lingkoranan sa Ubos Balay Balaoranan nga gilingkoran karon ni Cuenco pinaagi sa eleksiyon karong Mayo.

Ang pagpahibalo ni Guardo nga modagan batok ni Cuenco dili na bag-o alang sa mga Sugbuanong taga-habagatang distrito.

Pila na ka batan-on ang misulay sa paglumpag sa gahum sa mga Cuenco pinaagi sa pagsulay og atbang kaniya, pero wala gyud intawon manimaho. Sa eleksiyon, daw monggos nga gilat-an ang botos nga nakuha bisan wala molawig pag-ayo ang botos nga nakuha ni Cuenco.

Nahinumdom ko sa dihang midagan si Pareng Koko Holganza batok sa kapikas ni Cuenco nga si Nancy. Wala modaog si Pareng Koko.

Misunod og atbang si Aristotle Batuhan, apan naparot gihapon.

Karon, si Guardo na usab ang mosulay sa pamasin nga mailog na gikan ni Cuenco ang lingkoranan niining gipundar didto sa Kamara.

Ngano kaha? Unsa kahay rason nganong si Cuenco gyuy molusot? Hasta usab ako wala makasabot.

Dili usab ko motuo nga ang mga botante sa habagatang distrito nakuntento na sa dinad-an ni Cuenco maoy hinungdan nga dili gyud ko mailisan bisan kinsa pang batan-ona ang mosakbang.

Kay aduna bitaw daghang kongresista nga maayo og agi sa ilang distrito mailisan man gihapon.

Si Cuenco hinuon naila nang usa sa mga banggiitang magbabalaod tungod sa daghan nang mga balaod nga napasar niini. Gani, personal kong nakita si Cuenco nga nakiglalis sa kaubanang mga magbabalaod sa dihang ilang gidebatehan kadtong kontrobersiyal nga Anti-Terrorism Bill nga giyak-an karon sa Senado.

Makausa ra ko personal nga naka-ila-ila ni Guardo sa dihang nagkasugat kami sa SM Ortigas sa kauluhan kauban ko ang laing reporter nga uban ko sa general assembly sa Philippine Press Institute (PPI). Didto pa lang, mipadayag na siya sa iyang plano sa habagatang distrito.

Wala man bayay kuwestiyon kun interesado ang usa ka tawo nga moserbisyo sa katawhan. Usahay man gud maglibog lang kita unsa gyuy tinuoray nga plano sa usa ka tawo nganong bisan sa kaadunahan na ug kadaghan og kuwarta niini, moapil pa man gyud sa politika nga nasayod man unta silang hasol kaayo kini nga kinabuhi.

Maayo man usab hinuon nga moatbang si Guardo kang Cuenco aron may kapilian gyud ang mga Sugbuanong taga habagatang distrito kinsay ilang gustong morepresentar sa distrito didto sa Ubos Balay Balaoranan.

Sila na lang atong pahukmon.

Sa mga kampanya usab nato madunggan gikan ni Guardo ang mga binuang ni Cuenco sa distrito. Gisugdan naman gani pinaagi sa pag-expose niya sa paggamit sa pundo ni Cuenco aron ipamalit og uniporme sa mga tanod nga gibutangan og patches nga "Cuenco District."

Madunggan usab nato si Cuenco unya unsay mga binuang ni Guardo sa dihang siya pay komisyoner sa Sports sa siyudad ug sa miaging Southeast Asian Games dinhi sa Sugbo nga maoy naulbohan sa kaspa ni Mayor Tomas Osmeña.

* * *

SUMMIT. Daghan ang nanghinaut nga madayon na ang ika-12 nga Asean summit karong sunod nga mga adlaw.

Nahadlok intawon ang kadaghanan nga mahasol na usab kun isibog pa og laing adlaw ang Asean summit.

Dako man gud kaayo og kadaot nga nadulot kadtong pagsibog sa National Organizing Committee (NOC) sa Asean summit gikan sa Disyembre 11 ngadto sa 14 nga nausab karong Enero 11 ngadto sa 15.

Dili hinuon nato mabasol ang NOC kun nakab-ot nila ang ingon kakontrobersiyal nga desisyon. Bisan pa og dili katuohan ang rason nga ilang gipasiatab nga mao ang Bagyong Seniang, apan kadto kay gisibog may dakong rason nga sila lamang ang nasayod.

Dili nato mapugos ang NOC pagsabwag sa tinuod nga impormasyon nga makadulot og kahadlok sa mga Sugboanon ug sa international community nga ikabulabog sa kahimoan sa Asean summit.

Ang ato mao lang ang pagkooperar karon nga ihinayon na gyud ang Asean summit sugod ugma o sa sunod adlaw.

Ang mga tunghaan ug mga buhatan sa gobiyerno holiday sa Biyernes ug Lunes ug gitung-an ang Sabado ug Domingo nga matud anha diha himuon ang mga dagkong tigum sa mga pamuno nasud gikan sa mga nasud sa Southeast Asia.

Kadtong nahadlok nga may mga dautang mahitabo sa mga lugar sa Sugbo nunot sa summit mugna sa mga dautang elemento, maayong ipadayon ang maong kahadlok aron magmabinantayon kita o maglikay na lang nga mangadto nianang mga lugar nga kuyaw nga mahitaboan sa atong gikahadlokan.

Wala man tingale mawala kanato kun magbantay ug maglikay, dili ba?