Balut, penoy, balut!

Tatlong mamamayan na naghahanapbuhay

nasasalubong natin halos araw-araw;

Silang tatlo’y sumisigaw sa lansangan

nagbebenta ng pagkain at pamatid-uhaw!

Tinapay! Tinapay! Ang sigaw ng una

at pumupotpot pa kanyang bisikleta;

Taho! Taho! Sigaw ng pangalawa —

Balut! Penoy! Balut! Sigaw ng isa pa!

Madilim-dilim pa’y sugod sa trabaho

upang ang pamilya’y kumain nang husto;

Ngayong Bagong Taon nais nilang tatlo

sila ay kumita kahi’t ilang piso!

Panggising sa tulog: Tinapay! Tinapay!

na para bang manok sa madaling-araw;

Hindi natin batid ay iginagapang

ang apat na bunsong nasa high school pa lang!

At ang magtataho sa buong maghapon

arnibal at sago maubos ang misyon;

Para limang bunsong nasa college ngayon

may pang-Media Noche noong Bagong Taon!

Ang dalawang anak nitong magbabalut

nasa opisina na’t kapwa kumakayod;

Professional sila pagka’t nakatapos

sa t’yaga ng amang ang sigaw ay balut!

Kaya silang tatlo ay walang pahinga

dahil sa hangaring umasenso sila;

Hirap ang katawan subali’t masaya

pagka’t edukasyon sa anak pamana!

Ngayong Bagong Taon -— tatlong mamamayan

hindi alintana angking karukhaan;

Sila’y tatlong taong dangal ng Silangan

pagka’t nag-aangat sa pamilya’t bayan!

Di sila katulad ng maraming ama

na sa mga anak ay laging pabaya;

Mayayaman sila pero anak nila

kung hindi kriminal —- sugapa sa droga!