Sakit nga kamatuoran

Miinit na usab pagbalik ang isyu sa Visiting Forces Agreement human gibalhin si Lance Corporal Daniel Smith ngadto sa embahada sa Amerika bisan kun wala kini pagtugot gikan sa atong hukmanan. Kun kahinumduman, ang abogado sa sundawong Amerikano nga gikonbikto sa kasong pagpanglugos dinhi sa Pilipinas miduso og petition ngadto sa Court of Appeals human gibasura ni Makati RTC branch 139 Judge Benjamin Puson ang iyang petition nga nag-awhag sa husgado sa pagpabalhin sa kustodiya sa amerikanong sundawo, pinasubay sa nakalatid sa Visiting Forces Agreement. Apan bisan kun wala pay hukom ang labaw'ng hukmanan mahitungod sa petition, gibalhin na sa atong gobyerno ngadto sa embahada sa Amerika ang konbiktadong Amerikano. Tungod niini daghang mga experto sa balaod ang mi-question sa maong lakang sa Malacañang. Sa una, ang Malacañang nanghimakak sa iyang kalambigitan sa kontrobersiya, apan sa kadugayan giangkon ra sa Presidente nga ang gihimo sa iyang administrasyon mao lamang ang pagsalbar sa miaslom nga relasyon tali sa Pilipinas ug Amerika.

Si kanhi Senate President Jovito Salonga miingon nga pwedeng mapasakaan og kasong impeachment si President Arroyo gumikan sa tinuyong paglapas sa atong batakang balaod. Suko usab kaayo si kanhi Senador Wigberto Tañada gumikan sa garapalan nga pagpanalipod sa Presidente sa interest sa Amerikano kay sa interest sa iyang katawhan.

Ang kampo ni Nicole miduso na usab og kasong contempt ngadto sa labaw'ng hukmanan batok sa mga tag-as nga opisyal sa gobyerno, nga maoy responsable sa pagpabalhin sa piniriso ngadto sa embahada sa Amerika.

Si Presidente Gloria Macapagal-Arroyo mihangyo ngadto sa katawhan sa pagsabot sa iyang hukom tungod kay ang katuyoan niini mao lamang ang pagpreserbar sa maayong relasyon tali sa Pilipinas ug Amerika.

Kining kaso ni Smith maoy usa ka dakong buhing saksi sa masakit nga kamatuoran sa atong estado isip usa ka huyang nga nasud. Mosuway man tuod ta sa pagpanalipod sa integridad sa atong nasud aron dili kita mahimong kingkoy tan-awon sa mga mata sa atong mga silingang kanasuran, apan moduko ra gihapon kita tungod kay mao ra gihapoy ipatigbabaw sa atong mga lider, ang nasudnong interest. Hangtod dili kita mahimong lig-on nga nasud, hangtod magpabilin kita sa atong estado isip huyang nga nasud, padayon kitang makapaabot og susamang scenario. Sakit man apan pihit nato kining dawaton tungod kay wa pa kitay igong kusog nga ikaparang sa mga posible natong mga kaaway.

Sakto si Atty. Evelyn Ursua, abogado ni Nicole sa iyang pamahayag nga mas maayo pa ang Amerika kay nakahimo pa sa pagpanalipod sa ilang national nga kriminal. Pero ang Pilipinas wa gyud makahimo sa pagpanalipod sa iyang national nga maoy biktima sa krimin.