Bag-ong politika

Di na gyung kapugngan ang pagsulod sa election period. Mosugot ta og sa dili angayan na nga sugdan nato og himulso ang mga tawo nga posibling mamahimo natong sunod nga mga opisyal sa gobyerno sa mosunod nga tulo ka tuig.

Dinhi sa Sugbo, tawtaw na nga mopasubli si Gobernador Gwen Garcia ug si Bise Gobernador Greg Sanchez sa ilang mga gihuptang pwesto. Wa pay klaro kun kinsay mamahimo nilang kontra apan mitumaw ang pangan ni fourth district Rep. Clavel Asas Matinez.

Gawas ni Martinez ang mga posibling magtinguha sab sa pagkagobernador mao si kanhi Senador Sonny Osmeña. Apan tungod hinuon sa panag-alyado na nila sa politika sa pagkakaron posibling usa ra nila maoy molansar.

Pero bisan hain nilang Martinez ug Osmeña ang molansar, klarong wa silay dag-anan ni Garcia. Kon hisgutan ang makinarya, hitsas sa nanag makinaryas politika ang mga Garcia, gani hapit tanang mga mayor ilang kaalyado.

Kon kwarta ang hisgutan, bisan tinuod giilang kwartahan si Osmeña apan dili lang ang kwarta maoy garantiya pagdaug sa eleksiyon. Lahi ang batasan sa mga Sugbuanon tungod kay segurado kong di mahaylo og kwarta ang mayoriya niini.

Kon basihan ang matang sa pamolitika sa mga Garcia, Martinez ug Osmeña, makita kaayo ang dakong kalainan. Di na kinahanglan nato tagsa tagsaon kun kinsay mas maayo nila ang katawhan mismo sayod kon kinsay mas naka hatag nila og mga mehoras diha sa ilang dapit ug si kinsay opisyal nga nakaduaw sa labing bukid nga barangay dinhi sa lalawigan.

* * *

Dakong isyu sa politika hinuon nga posibling gamiton sa mga kaatbang ni Garcia sa politika mao ang pagpabarug niini og dinastiya sa politika dinhi sa Sugbo tungod sa pahibawo ni kanhi gobernador Pablo Garcia ug sa lain niya nga anak nga si Pablo John nga mopapili sila pagkakongresista diha sa segundo ug tirsiro distrito.

Labing siguro maputos ni sa pagsaway sa ilang mga kritiko tungod kay mogawas nga gusto nilang hakpon ang tanang pwesto sa gobyerno. Apan alang nako way sapayan og dominahon sa usa ka pamilya ang atong pang-gobyerno basta ang importante nga sensitibo sila sa panginahanglan sa kinabag-an ug nga ihiklin ang ilang personal interest.

Ang bag-ong klase sa politika ug ang garantisado nga liderato nga ato nang nasuwayan nga maayo maoy labing importante. Mag-unsa man kon ang atong pang-gobyerno dumalahon og lain-laing pamilya apan ang kaugalingong interest ug ang pagpaburot sa ilang kaugalingong mga bulsa maoy ilang ipasuwabi.

Ang importante sa atong piliong opisyal nga ang kwarta sa gobyerno di ideposito sa ilang kaugalingong bank account ug di moingon nga magpuasa ta kay wa tang mosuporta niya.

[email protected]