Gayotin goodbye, Comendador welcome!

Girelibohan kagahapon si Supt. Melvin Gayotin isip direktor sa Cebu City Police Office (CCPO). Mura og wala na gyuy mahimo niini si Mayor Tomas Osmeña.

Gihulip kang Gayotin si Supt. Patrosenio Comendador. Apan si Gayotin hulip usab ni Comendador isip hepe sa Regional Intelligence and Investigation Division-Operations.

Ang pagbalhin kang Gayotin ngadto sa RIID-Operations maisip nga promosyon, apan demosyon alang kang Comendador. Apan wala silay mahimo kun mao kini mando sa ilang mga labaw.

Apan bisan pa og maisip nga promosyon ang pagbalhin ni Gayotin ngadto sa RIID-Operations, kalihukan intawon kini sa dihang gipahibalo kini ni Police Regional Office - 7 Director Silverio Alarcio Jr. kagahapon.

Ang siyudad sa Sugbo daw nahimo nang uyab ni Gayotin nga maglisud na siya pagbiya niini tungod sa iyang ka-"inlove" sa iyang puwesto.

Apan ingon niini ang proseso kun gustong motubo sa "career" ang usa ka opisyal sa kapolisan. Mao usab sa kasundalohan, gusto gani motubo sa iyang ranggo ang usa ka opisyal sa armadong kusog, kinahanglan madestino kini og division gikan sa battalion, ug ngadto na sa staff, service, ug group ug command assigment.

Si Comendador dili hinuon layo sa dughan sa mga polis sa Sugbo.

Naila siya sa iyang pagka-buotan ug maayong tawo.

Apan siyempre, natestingan na usab si Comendador sa iyang trabaho sa RIID-7.

* * *

INTEL. Ang katakus ni Comendador sa RIID-Operations magamit kaayo niya sa iyang pamalakad diha sa CCPO karon nga siya na ang hepe.

Ang pagka-direktor sa CCPO kritikal kaayo tungod sa (dili lang kalapad sa hurisdiksiyon) mga nagkadaiyang krimen nga nanghitabo sa dakbayan.

Sa miagi lang tuig ug sa nanglabay nga katuigan ubos sa liderato ni Gayotin, pagkadaghang tulis sa bangko ug money changer nga nanghitabo.

Dili man usab kita makaingong hinay ang intelligence network ug kapabilidad ni Gayotin tungod kay aduna may pipila sa maong mga kaso nga nahatagan og kasulbaran.

Apan makaingon kitang "welcome development" ang pagbutang ni Comendador sa CCPO tungod kay aduna kini dakong background sa intelligence nga magamit niya pagsulbad sa mga pagpanulis ug uban pang krimen nga nanghitabo sa dakbayan.

Maingon-ingon gyud nga magamit ni Comendador ang iyang intelligence network sa dihang siya pa ang hepe sa RIID-Operations sa iya karong bag-ong katungdanan ug hurisdiksiyon isip hepe sa kapolisan sa dakbayan sa Sugbo.

Pun-an pa sa tandem sa abtik nga hepe sa Criminal Intelligence and Investigation Bureau nga si Supt. Pablo Labra, maayo pang manguros na lang daan ang mga kriminal ug manglayas gikan sa dakbayan sa Sugbo kay seguro gyung targeton kini sila sa duha ka batan-ong opisyal sa kapolisan.

* * *

GISUBHAN. Kagahapon lang, wala pay oras sa dihang miasumer si Comendador isip hepe sa CCPO, gitulis ang Yusay Credit and Finance Corp. sa Gorordo Avenue.

Hinuon, daling nailhan ang duha ka tulisan sa maong lending firm tungod sa gallery sa mga kriminal sa Theft and Robbery Section.

Gikonsiderar nang sulbad ang maong kasong pagpanulis sa Yusay. Kulang na lang niinin ang tukmang aksiyon human mailhi silang Doroteo Imperial ug Ronillo Nuñez nga maoy mga tulisan.

Kun mapasakaan na og kaso silang Imperial ug Nuñez, siyempre lutsan sila og warrant of arrest nga maoy gamiton sa kapolisan sa paggukod nila aron mabilanggo ug manubag sa mga kasong kriminal nga ipasaka batok nila.

* * *

LABOK. Dili kaayo "expose" sa media si Comendador. Wala pa gyud kita makaila ug makasinati unsa gyud ang iyang tinuod nga labok.

Sa mga estorya-estorya, nakaila na si Mayor Tomas Osmeña kaniya busa nagtuo ang kadaghanan nga nag-agi sa kunsultasyon ni Tomas ang pagbutang ni Comendador sa CCPO.

Busa, wala nay problema si Comendador sa pagka-permanente niyang hepe sa CCPO tungod kay segurong apil ang iyang ngalan sa Senior Officers Placement Board sa Camp Crame nga maoy pilian unya ni Tomas isip permanenteng hepe sa CCPO.