Nakalingkawas na kaha ta sa mga suliran sa nilabay na nga tuig 2006?
Mora'g wa baya. Pipila ka mga problema nga atong gisagubang sa miaging tuig, ato gihapon nga sagubangon ning bag-ong tuig kay wa pa man ni masulbad sa hingpit.
Ang politikanhong suliran pananglitan bahin sa pag-usab sa Batakang Balaod anaa gihapon ug gani duna pay kahigayunan nga mas moinit pa kini.
Nagpadayon usab ang problema bahin sa kaso sa Amerikanong Marine nga si Daniel Smith ug nagkabug-at na man gani hinuon kini tungod sa kalit nga pagbalhin niini sa US Embassy gikan sa Makati City jail.
Kini ug uban pang mga problema nga wa masulbad sa miaging tuig ato gihapon kini nga sagubangon niining tuig 2007.
Manghinaut kita nga ang kagamhanan makakitag solusyon sa mga suliran nga gipasa sa tuig 2006 nganhi sa tuig 2007 ug nga dili na unta kini kapun-an pa og laing mas bug-at pang problema.