EDITORYAL — Mga badlongong taxi drayber gi-warningan

And Land Transportation Franchising and Regulatory Board (LTFRB) mi-warning sa mga drayber sa taxi nga mopili sa ilang pasakyon ning panahon sa Kapaskohan diin puwerteng daghana sa pasahero.

Mao man gyuy sakit niining mga taxi driver nga mopili sa ilang pasahero panahon nga kusog ang sakay. Sakit kini nga dugay nang gihimo apan wa pa gyud mapapha.

Ang warning sa LTFRB gisentro lang sa Metro Manila diin suma pa sa balita daghan kaayong badlongon nga drayber sa taxi.

Iapil sab unta nila pagpasidaan ang mga drayber sa taxi sa Sugbo diin anaa say daghang mga drayber nga molapas sa nga lagda sa prankisa nga gikuptan sa ilang operator.

Kining pagpili lang sa ilang gustong pasakyon sakit kini sa daghang Sugbuanong drayber sa taxi diin ang nag-antos mao ang publiko.

OK, miluwat og pasidaan ang LTFRB, apan tumanon kaha ni sa mga badlongong drayber? Pila na ka higayon nga ang LTFRB mipagawas sa samang warning apan gipanghilam-os ra sa mga drayber.