Ouano vs. Quisumbing, klaro na

Nagkahayag karon ang posibilidad nga pulos batan-on ang magparang pagka-mayor sa dakbayan sa Mandaue kun mahinayon ang eleksiyon sa Mayo sunod tuig.

Ang kampo sa mga Ouano tataw nang moduso sa ilang manok nga si Jonkie Ouano. Samtang sa pikas kampo, walay laing ngalan ang mituyhakaw gawas sa ngalan ni Bokal Luigi Quisumbing sa ika-unom nga distrito.

Naghinayhinay na og kamas ang mga Ouano aron maduol sa mga botante si Jonkie, buluhaton sa yanong politiko matag eleksiyon. Mga kalihukan sa mga sityo pirme nang lingkoran ni Jonkie ug may mga sibiko nga kalihukang kanunay'ng makit-an ang batan-ong Ouano nga apo sa banggiitang politiko sa lalawigan, kanhi Mayor Pedong Ouano.

Si Luigi nga nailhan nang manununod sa industrialistang si Norberto Quisumbing nga maoy nanag-iya sa Norkis group of companies may taktika nga gisagop aron pagpahibalo sa dili direktang paagi nga dumadagan siya pagka-mayor sa maong dakbayan.

Sa report nga akong nadawat, may pautang kini ngadto sa mga kabus sa Mandaue.

* * *

POLITIKA. Anhi dinhi masukod ang kabanggiitan sa duha ka apilyedo sa Mandaue ug nga dinhi usab masukod ang sentimento sa katawhan kun angay pa ba nilang pilion ug padad-on sa renda sa pangagamhanan sa Mandaue ang mga Ouano o angay na ba kining ilisan sa bag-ong apilyedo nga mao ang mga Quisumbing.

Dili na matago ang panagbangi sa duha ka pamilya diha sa Mandaue. Mibusikad ang ilang panag-away sa dihang giputol sa kagamhanan sa Mandaue ang kontrata tali sa kagamhanan ug sa Norkis kalabot sa kontrobersiyal nga luna sa Looc, Mandaue nga gitarukan sa pasilidad sa Norkis.

Gani mao kini ang pabilo sa kaso nga gipasaka sa abogado sa Norkis batok ni Mayor Thadeo Ouano didto sa Office of the Ombudsman - Visayas.

Gikiha ni Atty Wilbert Dumon Jr. si Mayor Teddy tungod sa matud pa ilegal nga pag-take over niini sa luna sa Looc bisan wala kini pagtugot gikan sa konseho sa dakbayan. Gihulagway sa abogado nga abuso sa gahum ang gihimo ni Mayor Teddy.

Sumala pa sa pasangil nga daghang mga butang ang nangawala sa Norkis tungod sa ilegal nga pag-take over ni Mayor Teddy.

Apan, si Mayor Teddy pa, dili mahimong ilegal ang iyang pag-take over tungod kay gipapitlan man og notisya atubangan sa Norkis sa Looc sulod sa pipila ka adlaw, sa wala pa nila kuhaa ang luna.

Ilegal man o dili ang pag-take over ni Mayor Teddy, pasagdan na lang nato ang Ombudsman pagdesider niana.

Ang ato lang nga klaro na gyud nga adunay duha ka apilyedong magbangga sa Mandaue.

Kumusta man diay ang ubang apilyedo sa Mandaue? Sama sa mga Cortez, Seno, ug mga Soon?

Ambot lang!

Hangtod karon, daw nagpabiling minoriya sa natad sa politika ang maong mga apilyedo.

* * *

RESERVIST. Malampuson kaayo ang Assembly Test nga gipahigayon alang sa 1st Ready Reserve Battalion sa Philippine Army niadtong Sabado nga gitapos kagahapon, Domingo.

Kapin sa 300 ka mga reservist sa Philippine Army nga gibahin sa tulo ka kompaniya Alpha, Bravo ug Charlie and Headquarters Service Company ang mitambong ug miapil sa Assembly Test.

Gisukod sa mga evaluators ang naantigohan sa mga reservist gikan sa search and rescue, combat skills, ug environmental training.

Ang 1st RRBn gipanguluhan karon sa battalion commander nga si Maj. Richard Sison, ug gidumala sa 7th Regional Community Defense Group ubos ni Col. Guillermo Luyao Jr. ug 701st Community Defense Center ubos ni Maj. Samson Deles.

Alang niadtong mga reservist nga wala makatambong sa duha ka adlaw nga assembly test, giawhag kamo sa pag-report sa 701CDC aron sa pag-fill up og Reservist Individual Data Sheet (RIDS). Giawhag kamo sa pagdala sa inyong enlistment order ug litrato nga nakauniporme og BDA.

Niadtong nakagradwar sa Basic ROTC sa kolehiyo, maisip na kamo nga reservist ug giawhag kamo sa pag-report sa 701CDC dala ang inyong transcript of records.