EDITORYAL - Mahinayon pa ba ang Summit?

Malipay kita nga gipaninguha sa ASEAN Summit National Organizing Committee nga mahibalik dinhi ang tanang heads of state sa napu ka nasud nga sakop sa Association of Southeast Asian Nations unya sa Enero 8 ngadtos 13, 2007 ang bag-ong iskedyul sa tigom.

Maayo unta kon magmalampuson sila aron makabawi-bawi kita sa bulilyaso nga nahitabo diin giuswag ang Summit tungod kuno sa bagyong Seniang.

Apan dili maayo ang panglantaw sa pipila ka mga tigpaniid, lakip na gani ang pipila usab ka mga opisyal sa gobiyerno sa gawas sa nasud.

Ang ministro sa ekonomiya sa Japan nga si Akira Amari, pananglitan, nagtuo nga dili na mahinayon ang 12th Asean Summit ug matud niya ang pag-postpone sa Summit diin gipasangil ang bagyo nakadaut sa kredibilidad sa Pilipinas.

Nagtuo si Amari nga daghan sa mga heads of state sa Asean ang dili na makatambong sa Summit dinhi unya sa Enero kay duna na silay commitment ngadto sa ubang mga kalihukan sa nagkalain-laing kanasauran.

Manghinaut kita nga sayop ang pagtuo ni Mr. Amari ug sukwahi sa iyang gipanglantawan mahitabo gihapon ang Summit dinhi sa Sugbo diin pagatambongan sa tanang pangu sa mga nasud sa sakop sa Asean.