(1) Sa PGH, mas pinaganda na ngayon ang BURN CENTER. Pisikal at emosyonal na pagpapagaling ay mas napadali. Lalo na sa mga batang pasyente. (2) Sa malalaking siyudad, inumpisahan na ang distribusyon ng mga asbestos suit (P250,000 kada isa) sa mga bumbero. Maari na ngayong saklolohan kahit pa yung biktimang napalibutan ng apoy. (3) Sa mga kolehiyo at pamantasan, mahigit 40 nang istudyante ang nabibiyayaan ng scholarship fund at magkakaroon na pagkakataon ng makapagtapos. (4) At mga magulang na naulila sa anak ay mayroon na ring kanlungan na matatakbuhan sa INA Foundation Healing Center. Damay at pag-unawa ang maaasahan sa kapwa nilang naulila.
Ang lahat ng ito’y pamana. Nagmula sa puso ng pamilya ni Speaker Joe at Manay Gina de Venecia. Hindi matatawaran ang kalaliman ng pighati ng mga naulila ni KC. Subalit kahit papaano’y humihilom ang sugat. Dahil hindi rin matatawaran ang karurokan ng pasasalamat ng mga nakaraos sa trahedya sa tulong ng mga proyektong ito.
Sa tuwing may isang batang nakayanang makangiti matapos ang matinding kirot ng pagpapagaling ng sunog niyang balat sa Burn Center; sa tuwing may maililikas na nakulong sa tahanan dahil sa napakalakas na apoy; sa gaan ng damdamin matapos makamit ng iskolar ang pinakaaasam na college diploma; at sa bawat patak ng luha na napawi sa kapit kamay na pagbuno sa takipsilim at pagharap sa bukang liwayway ng mga inang naulila ay naaninag ang diwa ni KC.
Sa kanyang pangalawang kaarawan sa langit, sana’y masabayan ninyo ang REPORT CARD sa pag-alay ng panalangin para sa walang hanggang kaligayahan at kapayapaan sa piling ng Diyos ni KC De Venecia.