Kublan sa lagda

Dihang giawhag ni Msgr. Achilles Dakay, media liaison officer sa Artsidyosesis sa Sugbo, ang kagamhanan sa pagtug-an sa tinuod nga hinungdan sa kalit nga pagkauswag sa Asean Summit, usa ka opisyal sa Dakbayan sa Sugbo, nga di lang nato nganlan dinhi kay kuyaw kon maoy mabuthan sa kontrobersiya ug di na hinuon pakalawaton, niawhag nako pagsumbalik pag-awhag sa kaparian kinsa ang ilang kauban nga gipasanginlang nagbinastos sa babayeng mga tinun-an nga iyang gipakumpisal.

Makiangayon ang awhag ni Dakay. Apan wa sab mag-inusara ang politiko sa iyang pagtuo nga dunay gamayng hilas ang baruganan sa simbahan: Nidemanda sila og kamatinud-anon, accountability ug transparency sa nagkalainlaing mga hut-ong sa katilingban, labi na sa kagamhanan ug mga politiko, apan niinsistir sab nga exempted sa samang mga lagda sa kamatinud-anon, accountability ug transparency ang kaparian ug ang kadagkoan sa simbahan.

* * *

Tan-awa ra gud unsay gihimo sa kadagkoan sa simbahan ning labing uwahing kontrobersiya sa pari, nga wa pa mailhi hangtod karon, igo lang gihulagway nga tambukon, itumon ug kuwarentahon, nga gipasanginlang nanghikap sa pribadong bahin sa lawas sa 18 ka babayeng mga tinun-an nga nangumpisal niya atol sa Life in the Spirit Seminar (LSS) nga gitugotan ni Cebu City Schools Division Superintendent Leonilo Oliva ug sa Oasis of Love (OL) sa Abellana National School (ANS) usa na ka buwan ang nilabay:

• Gitagoan sa ANS, ni Oliva ug sa OL ang ngan sa pari bisan kon giingong suod na nila kay suki na sa nangagi pang mga LSS;

• Ang artsidyosesis nagdumili pagpakita sa gidudahang pari bisan sa tinarung nga awhag sa Department of Social Welfare and Development (DSWD) ug sa ubang mga imbestigador sa kaso; ug

• Bisan sila ray nagtago sa ngan sa pari, ang artsidyosesis nipahunong sa ilang kaugalingong imbestigasyon sa kay wa man maklaro kinsa ang pari nga gipasanginlan.

* * *

Makasimpatiya ta sa kahimtang nilang Arsobispo Ricardo Kardinal Vidal ug sa ubang kadagkoan sa simbahan: Ang labihang kanihit sa mga pari maoy nakapugong sa matinud-anon nga pagsusi sa kahiwian ug pangabuso nga gipasangil batok sa ilang ginsakopan. Maong napugos sila pagpabilin sa mga pari nga gipasanginlang nangabit og babayeng minyo, ni-solemnize sa iyang kaugalingong kasal, nakighilawas sa mga batang sakristan, nanglugos og batang katabang, nangurakot sa kuwarta sa mga parokyano, nanagmal ug daghan pang uban.

Sa ilang determinasyon pagpanalipod sa ilang kaparian, nataligam-an sa kadagkoan sa simbahan ang ila sang katungdanan pagpatigbabaw sa hustisya alang sa inosenteng mga biktima. Nga ang kasagaran ila pa gani hinuong gipasanginlan nga kon wa mamakak maoy nanental. Sa kamahigugmaon sa simbahan nga moawhag sa kaangayan, way bisan usa ka pari nga nagsusi sa tinuod nga nahitabo sa mga tinun-an sa Abellana, ni nihapuhap ug ni-alam-alam nila sa tungod eskandalong nahiagoman.

* * *

Email:[email protected]