ASEAN sangit!

Tan-awa nang gipanghambog natong Cebu International Convention Center (CICC), nagbaha niadtong Sabado sa pagsugod sa bagyong Seniang.

Anghel gyud kini si Seniang kanatong mga Sugboanon. Kay kun wala pa siya, dili gyud unta nato mahibaw-an ang mga depekto nianang multi-million convention center.

Unya, Atty. Pablo John Garcia, kinsa may sakto ninyo ni anhing Max Soliven?

Res ipsa loquitor!

The thing speaks for itself, dili ba? Abogado man gyud ka, attorney, nakita man nimo nga depektoso gyud nang gipanghambog ninyo (este, nato) nga CICC.

Si anhing Max Soliven misaway sa pagdalidali og tiwas nianang kontrobersiyal nga CICC. Nahadlok intawon si Soliven, ang labing tinamod nga kolumnista sa nasud nga nagsulatan sa Philippine Star sa wala pa siya mamatay sa ospital sa Japan, nga basin unya og sa higayon nga himuon na ang mga konperensiya sulod sa CICC, may kalit lang mangatagak gikan sa ibabaw unya mangaigo ang mga delegado.

Wala mahitabo ang gikahadlokan ni Soliven kay walay atop nga natagak. Apan, dakong mensahe ang gidala ni Seniang kanatong mga Sugboanon: GUBAON ANG ATOP NIANANG BAG-ONG CICC NGA KUN MAG-ULAN OG KUSOG MOSULOD ANG TUBIG UG MAGBAHA DAYON SA SULOD.

Unya, Atty. Pablo John Garcia, idayon pa nimo ang imong hagit pagpakig-debate ni Leo Lastimosa?

Mao nay nakadaot ninyo. Abi kay naa na kamo sa gahum, mo-ulpot dayon inyong sampot kun may mga tawong manaway sa inyong kapalpakan ug mogamit dayon sa tanan ninyong impluwensiya aron pag-discredit sa mga tawong nag-komentaryo sa inyong mga lihok.

Nagduda ko nga morason pa gyud ang mga Garcia nianang pagbaha sulod sa CICC niadtong Sabado pagsalbar sa dagway ni Gobernador Gwendolyn Garcia gikan sa mga pagsaway sa ubang sektor.

Naluoy lang intawon ko sa ubang tawo (sama nilang Soliven ug Lastimosa) nga naningkamot nga makatabang paglatos sa mga tawong nalambigit sa proyekto sa pamasin nga makatabang sa ilang paagi pagtarong nianang CICC.

Maayo ra gyud nga gisibog ang ika-12 nga Asean summit ngadto sa unang semana sa Enero aron makorehian pa sa hambugerong arkitekto nga si Manuel Guanzon ang mga guba-gubang atop sa CICC.

I-ampo lang nato nga dili mahitabo ang gikahadlokan sa uban nga tungod nianang sitwasyon sa CICC ug daghan pang kakulangan sa pagpangandam, dili idayon dinhi sa Sugbo ang summit. Apan mas maayong dili na lang usab kita mo-"presume" nga anhi idayon ang Asean summit kay basin og ma-"frustrated" lang kita kun ang mga opisyal sa Asean momandong ikanselar ang kalihukan dinhi sa Sugbo.

* * *

KONSEHALA. Nahibalo na diay ko nganong balisa kaayo si Konsehala Nina Gahito sa Pahina San Nicolas sa dihang napatik niining pamantalaan ang gisulat ni Darrel Carumba ang resolusyon ni Konsehal Edgardo Labella nga nag-awhag sa Ombudsman nga dalion ang imbestigasyon mahitungod sa kapakyas paghatag ni Kapitan Victoriano Go sa honorarium sa mga sakop sa Lupon Tagapamayapa sa maong barangay sukad niadtong 2004.

Adunay anomalosong pag-divert sa pundo nga angay unta sa honorarium sa mga sakop sa Lupon Tagapamayapa ngadto sa ubang katuyoan nga wala na itugot sa balaod.

Pastilan, klaro man kaayong "misappropriation" kun tinuod ang akong nahibaw-an nga gigamit ni Kapitan Go ang pundo ngadto sa "bayranan" (wala masayri kun unsa nang gibayran) ngadto sa Association of Barangay Council. Kun tinuod! Kun dili tinuod? Malversation na pud na, kap.

Lain nakong nahibaw-an, si Konsehala Gahito aduna diay bana nga Lupon usab nianang maong barangay ug nga sa higayon nga mangabot ang honorarium nga gikan sa barangay, siya maoy mangunay og kobra, dili ang iyang bana. Aw, kun kobrahon lang, wala nay problema kay asawa gud siya.

Apan aduna diay "internal arrangement" ang 12 ka Lupon Tagapamayapa sa Pahina San Nicolas. Kining maong kasabutan gihimo kini mismo nilang mga Lupon aron mabahin ang gamay kaayong budget nga alang sa Lupon sa maong barangay.

Sa 12, lima lang ang budgetado kay sila lamang ang nakarga. Busa, silang lima ang modawat sa honorarium apan ibalik ngadto sa ilang treasurer aron bahinon nilang 12. Nindot kaayo nga kasabutan.

Apan dihay higayon nga si Konsehala Gahito ug laing usa ka Lupon nagdumili sa paghatag sa honorarium sa iyang bana ngadto sa treasurer sa Lupon Tagapamayapa. Ang nahitabo, nalawgaw ang budget.

Si Kapitan Go mibahad ngadto sa mga Lupon nga nanumbong ngadto sa Ombudsman nga iyang ilisan karong Disyembre. Kun akoy Go, ayaw na lang. Kay mosamot imong problema kun tinud-on ka nianang mga Lupon Tagapamayapa nga inyong gipanglupigan.

May report ko nga nadawat batok nianang sekretarya sa Pahina San Nicolas nga pag-umangkon ni Konsehala Gahito. Apan, may gipaabot pa ko nga dokumento una nato iyagyag ang anomaliyang gisudlan niining sekretaryaha nga kaniadto tresurera diha sa maong barangay.

Hala, hari man kaha mo! Tan-awon nato.