Ordinansa vs dispatser way tarong pagpatuman

Dili ko motuo nga mapakgang na kining pagpangilkil sa mga dispatser ngadto sa mga drayber og PUJ pinaagi niining pag-amendar sa ordinansa nga nagsilot sa pagpanawag og pasahero sa mga karsada sa dakbayan.

Gikan sa P200 nga multa sa masakpang nalambigit niining trabaho sa dispatser, gihimo na kining P5 mil sa konseho.

Sa ato pa, kay P5 mil na ang multa, mapakgang na kining problemaha?

Dili ko motuo!

Hinaut naghimo og research ang konseho una pa sila mihimo niining maong lakang pag-amendar sa maong ordinansa. Sa akong obserbasyon, wala sa multa ang problema. Bisan P200 ra tuod kana, apan mahimo gihapon nga mapakgang ang pagpangilkil sa mga dispatser ngadto sa mga drayber sa PUJ.

Unsaon man?

Simple, pakusgan ang pagpanakop nianang mga dispatser. Mag-unsa man nang kadako sa multa unya walay enforcement sa ordinansa?

Sa akong pagtuyok-tuyok sa siyudad sa Sugbo, nagkadaghan ug nagkadaghan ang mga dispatser, bisan pa sa ordinansa nga gipasar sa konseho. Dili ang multa ang problema kun dili ang pagpatuman sa ordinansa.

Sama pananglit diha sa dalan Colon, hilabihan kadaghan sa mga polis nga anaa diha nianang lugara.

Aduna pa gyuy mga patrol car nga magbahasbahas sa karaang karsada ug mo-estambay pa atubangan sa Gaisano Metro-Colon diin sa atbang nga bahin, dayag kaayo ang mga dispatser nga manawag og pasahero sa mga PUJ para Talamban, Tabunok, Inayawan, Pardo, ug Basak.

Apan unsa kadaghan sa mga polis sa Colon mao usab kadaghan sa ilang katapulan pagpatuman sa ordinansa batok nianang mga dispatser.

Dili ko motuo nga wala masayod ang mga polis sa ordinansa nga nagdili sa mga dispatser.

Akong klaruhon, wala ko mosupak niining pagpataas ngadto sa P5 mil sa multa sa dispatser nga madakpan sa mga awtoridad. Ang ako lang, ubanan unta kini og seryosong pagpatuman aron makab-ot ang tuyo ug tumong, ug aron dili mausik ang kamahinungdanon, sa ordinansa.

Pustaanay pa, dili mahurot ang dispatser sa siyudad sa Sugbo, bisan pa nianang kataas sa multa. Ipatuman man ugaling, pero hangtod kanus-a ra.

* * *

PAHINA-SAN NICOLAS. Naglibog ko unsay nasulod sa utok nianang konsehala sa Pahina-San Nicolas nganong ang akong inahan maoy iyang gipabuthan sa iyang gibati mahitungod niadtong isyu sa Banat News kabahin sa resolusyon ni Konsehal Edgardo Labella nga nag-awhag sa Ombudsman-Visayas nga ipadali ang imbestigasyon batok ni Kapitan Victoriano Go sa Pahina-San Nicolas nga gipasanginlang napakyas paghatag og honorarium sa mga sakop sa Lupon Tagapamayapa sa maong barangay sulod sa taas nga panahon.

Si Konsehala Nina Gahito mipatawag gyud intawon sa inosente kong inahan ug maoy gisikasikaan kay lagi wala siya makauyon sa napatik nga balita sa Banat News.

Nagtuo tingale si Gahito nga maka-apil-apil akong inahan sa akong trabaho dinhi sa Banat News. Por dios por santo, ingnon tika konsehala nga wala gyud intawoy kalibutan akong pamilya niining akong trabaho. Napulo na ko ka tuig sa Banat News - isip reporter bali'g kapin sa duha ka tuig ug editor sulod sa dul-an sa walo ka tuig - pero wala gyud ko makahinumdom nga nakapanghilabot si bisan kinsang miyembro sa akong pamilya niining akong trabaho.

Hilabihan pa gyud nimong ka-hambugera, konsehala Gahito, sa dihang imong giingnan ang akong inahan nga "isog ka" unya imong "ipangkiha ang taga-Banat." Kun mao nay imong plano ang pagkiha sa Banat News, padayona na kay imo nang katungod, apan hangyo ko lang nimo, hatagi og gamay'ng respeto akong inahan kun gusto kang respetohan usab nako isip konsehala sa silingan namong barangay.

Wala gyud ko makaila nimo, pero sa gisulti sa akong inahan kabahin sa imong "batasan" nga gipakita nimo ngadto niya, nakaingon ko'ng angay pud kang i-Ombudsman ug dili ka angay respetohan ug pilion og balik pagka-konsehal sa imong barangay.

Nagplano gani ko nga maoy mangunay og himo sa affidavit-complaint sa akong inahan aron isang-at batok nimo ngadto sa Ombudsman. Wala gyud ko maka-uyon sa imong gibuhat.

Mura na ka'g si kinsa diha sa imong barangay. Imo pa'ng giingnan akong inahan sa dihang giingnan kang dugay na kanang isyuha nga "karon pa nakabasa ang hari."

Ah diay! Hari diay ka. Pastilan! Pangutan-on tika, unsay nabuhat nimo sa imong barangay?

Pasabton tika, konsehala Gahito, bahin nianang isyu sa honorarium, dili intawon ako ang writer niana. Si Darrel Carumba. Busa, ayaw pag-insister nga ipaingon nimo sa akong inahan nga "nagpataka lang ko" unya "mga bugo" kaming taga-Banat News.

Kun akoy ikaw, konsehala Gahito, mianhi unta ka sa Banat News kay pasabton tika giunsa namo pagkuha ang balita unya malinawan usab kami sa tinuod nga estorya.

Unsaon man nato pagkasinabot kun akong inahan imong ipatawag nga wala man gyud na siyay labot sa Banat News? Basin nahadlok kang mahibaw-an hinuon ang tinuod nianang maong isyu maong wala ka modirekta dinhi sa Banat News unya akong inahan imong girombo kay nagtuo kang dili makasukol nimo.

Mao kini nakadaot sa mga tawong mapili na sa katungdanan. Nagtuo na gyud nga mga hawod, dili na masayop ug gamhanan na ug dili na matandog.

Wala gyud intawon hunahunaa nga adunay Konstitusyon nga nag-ingong "Public office is a public trust." Ayaw intawon ninyo kalimti nga kanang gahum nga inyong gihuptan temporaryo lamang ug ang katawhan ang tinubdan niana.

Dili intawon mo Hari, sumala pa sa pangangkon ni konsehala Gahito.