Puli ni Oliva

Kining pagpapirma sa mga petisyon nga nagpaluyo kunohay ni Cebu City Schools Division Superintendent Leonilo Oliva karaan nang raket sa mga opisyal nga nahigam ug di na ganahang mamuhi sa gahom. Bisan pila pay mopirma sa petisyon nga gipasiugdahan sa mga superbisor ug mga prinsipal sa mga eskuylahang publiko sa dakbayan, di ni mahimong iwara-wara nga pruyba sa katakos ni Oliva sa katungdanan ni sa gugma sa mga magtutudlo niya.

Kon kasarangan kang magtutudlo o prinsipal, makaako kaha ka pagbalibad pagpirma sa petisyon nga gidudho sa imong labaw? Nga, bisan pag mahinayon nga mapalagpot si Oliva, ang imong labaw magpabilin nga naa sa posisyon paglisudlisod nimo tungod sa imong pag-isnab niya? Mao nga kon may igong kaligdong ang mga superbisor ug mga principal, palihug pasagdi si Oliva nga manalipod sa iyang kaugalingon gikan sa labing bag-ong kontrobersiya nga iya ra sang tinuyoan.

* * *

Sa makausa pa, napamatud-an sa kaso ni Oliva nga ang pagtabon mas dako pa kay sa orihinal nga kasal-anan nga gitabonan. Kon gitarung pa lang unta ni Oliva pagduma ang eskandalo sa giingong pagbinastos sa pari nga nagpakumpisal sa babayeng mga tinun-an sa Abellana National School (ANS), mahimong igo rang masuspenso ang Life in the Spirit Seminar (LSS) sa Oasis of Love (OL) sa mga eskuylahang publiko.

Apan inay pahibaw-on ang Department of Social Welfare and Development (DSWD) nga maoy gimbut-an sa balaod aron matarung pag-atiman ang mga bata ug masusi ang ilang mga pasangil, si Oliva igo lang hinuong nitugyan sa tahas pag-ila ug pag-imbestigar sa gipasanginlang pari ngadto sa OL nga utrong imbestigahunon.

Tungod sa iyang pagsakripisyo sa interes sa mga bata aron lang pagtabon sa iyang papel sa eskandalo, mahimong mag-una pag kasuspenso si Oliva kay sa LSS.

* * *

Gawas pa, kon tinuod gyong ligdong ang mga superbisor ug mga prinsipal, niadto ra unta sila nga naghiusa pag-awhag nga pulihan na si Oliva sa katungdanan. Dugay rang nilapas si Oliva sa limitasyon sa termino nga gitakda sa Departamento sa Edukasyon (DepEd) ug wa igdungog nga nanghawod ang Cebu City division ubos sa iyang pagduma-kanunay hinuong nangiwit sa nangaging national achievement tests.

Ang lain lang kabalaka sa mga magtutudlo mao nga ang gihugunhugon nga ipuli ni Oliva gihulagway na nilang daan nga utro sang badlungon ug mapahimuslanon.

* * *

Ang DYAB Abante Bisaya ug ABS-CBN Cebu pormal nang nilusad sa Kapamilya Relief Campaign alang sa makaluluoyng mga biktima sa bagyong Reming sa Albay ug ubang bahin sa Luzon. Gikahadlokang kapin sa 400 ang nangamatay sa katalagman.

Ang labing dinaliang panginahanglan sa kaliboan ka mga pamilya nga naigo sa bagyo mao ang bugas, sardinas, noodles, binotelyang tubig mainom, tambal, mga sinina ug mga gamit sa panimay.

* * *

Email: [email protected]