Pasko na gyod

Tukma gyod nga magmugna og ordinansa ang dakbayan sa Sugbo nga mosilot niadtong mga kontraktor nga magtukod og building unya mobutang ra sa ilang construction materials diha daplin sa karsada.

Giklaro gyod sa committee on laws sa konseho sa dakbayan nga ang gisugyot nga ordinansahon ni Konsehal Sylvan "Jack" Jakosalem dili supak sa balaod ug angay kini nga ipatuman.

Bisan ako, pabor kaayo nga mugnaon ang maong ordinansa, unya kinahanglang dakoon ang silot. Apil sa silot mao ang pagkanselar sa permit nga gihatag sa dakbayan ngadto sa kontraktor.

Tukma kaayo nga ang pagdiskarga sa kargamento diha sa mga construction sites, himoon lang gikan sa alas 10 sa gabii ngadto na sa alas 4 sa kaadlawon.

Nagpasabot kini nga inigkabuntag, kinahanglang hapsay ug wala nay makababag sa mga moagi nga sakyanan.

Dili sama sa gihimo kaniadto sa kontraktor sa usa ka building diha sa eskena Leon Kilat ug P. del Rosario nga nakahatag og problema sa mga traffic enforcers.

* * *

Nangangkon ang kapolisan nga napangitaan na nila og sulbad ang mga mitumaw nga problema mahitungod sa pagsirado sa mga karsada nga maoy agian sa mga delegado sa Asean Summit.

Husto ang sugyot ni konsehal Jakosalem nga kinahanglan paagian sa tanang mga sakyanan ang "ceremonial routes" kon miagi na ang convoy sa mga delegado.

Ang maong mga delegado motambong man kini og tigum sa lain-laing "venue" dinhi sa Sugbo, apil na diha sa Cebu International Convention Center.

Sa ato pa, kon hapit na gani ang oras nga ang maong mga delegado mobalik na sa ilang tagsa-tagsa ka hotel, anhi pa nga sirad-an na usab ang karsada.

Bisan og usa ka oras sa dili pa ang pag-agi sa mga delegado maoy pagsira, nindot na kaayo kay sa sirad-an pirmi.

Ang hangyo sa mga opisyal sa barangay Busay nga maaspalto unta sa dakbayan ang kinatibuk-ang "alternative route" diha sa barangay ingon sa dili mahimo kay ang karsada gipanag-iya kini sa pribadong sektor.

* * *

Ang higala nako nga si Rene Alquisola, ang manager sa Radyo ng Bayan, dinhi sa Sugbo dunay kabalaka nga pangawaton ang mga mahalong dekorasyon nga gibutang diha sa Juan Luna Avenue alang sa Asean Summit.

Dili tuod imposible nga dunay mangawat sa maong mga dekorasyon. Gipangawat man gani kanang mga rehas sa puthaw nga gibutang isip babag nga dili malabangan ang karsada, kana pa kaha nga mahalon nga matang sa dekorasyon.

* * *

Sa ngalan sa mga sakop sa media dinhi sa Sugbo, akong pasalamatan ang Aboitiz ug ang San Miguel Corporation sa pagdalit nila og Christmas party sa mga sakop sa media kaniadtong miaging gabii.

Ang Aboitiz didto mag-party sa Marco Polo Hotel, ang kanhi Cebu Plaza, samtang ang SMC didto usab mag-party sa Casino Español de Cebu.

Daghan kaayong mga dagkong ganti ang gipanghatag sa mga palarang mananaug, ilabi na sa mga kinaraang duwa atul sa Aboitiz party. Ako hinoon, wala gyod makadaug apan sagdi lang.

* * *

Ang tanang mga kawani sa Freeman-Philippine Star dinhi sa Sugbo magpahigayon sa among Christmas Party diha sa usa ka dakung hotel sa sitio Kamagong, Lahug unya sa Disyembre 16.

Maminaw na usab kami sa "good news" ni Sir Miguel Belmonte, ang presidente ug chief executive officer sa Philippine Star.

Bongga kaayo ang Christmas Party sa Freeman-Philippine Star, ilabi na kay hapit na usab kami mamalhin sa bag-o ug hamugaway kaayong building sa Philippine Star diha sa eskena V. Gullas ug D. Jakosalem.

Apan mao lagi, kay nindot na man kami og opisina, kaming tanan magsul-ob na gyod pirmi og Amerkana o kaha Barong Tagalog.