Ang kaayo ni Haring Pluto

Adunay usa ka hari nga nabantog tungod sa iyang kaayo ug kamanggihatagon. Siya si Pluto. Usa ka adlaw niana iyang nahibalag ang usa ka bakol nga makililimos. Tinukmod sa dakong kaluoy iya kining gihangyo nga unta iya kining ubanon aron mahatag niya ang bisan unsa nga gusto niini. Tuod man, tungod sa maanindot nga kahigayonan, nikuyog ang maong bakol nga makililimos. Gidala siya ni Haring Pluto sa gingharian niini ug gipasulod sa usa ka gamay nga lawak nga puno sa mga alahas. Gipakuha ang bakol kutob sa mahakgom sa iyang mga kamot. Sa dayong gawas nila, adunay gikumkom ang hari ug iya kining gidalit ngadto sa makililomos agig bugti sa mga nahuptang mga sinsilyong bulawan. Apan nagdumili ang naulahi. Ang wala lang niya masayri nga ang gikumkom sa hari mao diay ang yawe sa pinakadakong lawak diin nahimutang ang pinakadaghang alahas ug bahandi sa maong gingharian!

Pamalandong

Ang naghinobrang pagkagapos sa kahakog maoy magpakgang sa bisan unsang kalamboan ug kalampusan nga makab-ut sa usa ka tawo.

* * *

E-mail: paiskaris@yahoo.com