Pating sa Sugbo

Ang hudlat ni Justice Secretary Raul Gozalez batok sa mga magprotesta atol sa Asean Summit sunod buwan nga itambog sila sa Mactan Channel aron ipakaon sa mga pating nagmatuod nga nagpataka na lang ug nahimuwag na siya sa kamatuoran:

• Way pating sa Mactan Channel;

• Ang mga pating naa sa duha ka tampi sa dagat; apan

• Bisan way pating, mameligro gihapon ang mga aktibista kay gihulagway ang Mactan channel nga moambas na sa kahugaw sa kadagatan sa Guimaras nga gihabolan sa oil spill.

* * *

Ang mga tagduma sa trapiko nipasabot nga, bisan nagdugo ang ilang kasingkasing alang sa kaliboan ka mga Sugbuanon nga mahasol, malangay ug matanggong sud sa upat ka adlaw sunod buwan, di mahimong mub-on ang duha ka oras nga pagtak-op sa mga ruta sa summit matag lihok sa mga delegado. Matod ni Frank Brazil, hepe sa Lapu-Lapu City Traffic Management System, nipahibawo nga ang matag head of state dunay 25 ka sakyanan nga convoy. Sa ato pa, dul-an sa 500 ka sakyanan ang maglumbay uban sa napu ka mga pangu sa Asean ug sa walo ka dialogue partners sa ilang pagbalhin-balhin gikan sa usa ka venue ngadto sa lain.

Nipasalig hinuon si Brazil nga kaduha ra matag adlaw mobiyahe ang 18 ka heads of state-kausa sa buntag, inigpanggawas nila gikan sa ilang hotels ngadto sa venue, ug kausa sa hapon, inigbiya nila sa venue balik sa ilang hotels. Matod ni Brazil gitakda sa mga tigpasiugda nga magsunud-sunod ang mga tigom sa tibuok adlaw sa usa lang ka venue, o kun mobalhin man sa duol o silingan ra nga venue, aron maibanan ang kayamukat sa trapiko ug ang hulga sa seguridad sa mga delegado.

* * *

Gidasonan dayon ni Arnel Tancinco, executive officer sa City Traffic Operations Management (Citom), ang sugyot sa transport groups nga ipatuman ang odd-even scheme atol sa upat ka adlaw nga Asean Summit aron maibanan ang kahuot sa mga sakyanan. Matod ni Tancinco ang sugyot tukion sa Citom Board uban sa color-coding scheme, pag-usab sa mga oras tingtrabaho sa pribadong mga kompaniya ug ubang mga paagi sa pagpahapsay sa trapiko.

Nipasabot si Tancinco nga mas makiangayon ning maong mga sugyot kay sa tanyag sa pipila ka PUJ drivers nga mohunong sila sa pagpamasahero bugti sa hinabang nga pagkaon alang sa mga sakop sa ilang pamilya gikan sa Disyembre 11 ngadto sa 14. Kun way PUJs nga mosubay sa mga ruta, matanggong ang mga mamumuo kay gibakwi man sa Malakanyang ang upat ka adlaw nga holiday nga gideklarar niadtong Marso.

Nisugyot si Brazil nga kinahanglang sabotan sa labing daling panahon sa tulo ka dakbayan-Sugbo, Mandaue ug Lapu-Lapu-ang mas epektibong pagpatuman sa odd-even scheme o ubang mga sulbad sa pagkabara sa trapiko.

* * *

Email: leo_lastimosa@abs-cbn.com