ASEAN Summit: Happy days sa mga commissioner?

Maghisgot tag negosyo, kining pagpamaligya ug pagpamalit, usa ka SOP, natural ug naandan nga pamaagi aron modako ang halin, mao ang paghatag og pahinungod ngadto sa mopalit.

Natural kini. Kay kon di ka kamaong mopahinungod sa mga pumapalit, ayaw na lag apil sa negosyo. Puyo na lang kas balay.

Ang mga pahinungod come in different forms. Mahimo nga mga gift certificates, mga birthday gifts, mga allowances, giveaways, ug daghan pa. Ang most common, mao ang gitawag nga commission. Ordinaryo na kaayo, dili na gani ni ikauwaw. Ang uban mo-demanda gyud, mo-dictate pag pila.

Sa namaligya o sa naghatag sa serbisyo, sila ang mouna pagbungat pilay komisyon. Unya, ang walay puangod nga "commissioner, mohangyo ug mositar og pila ka percent ang ipatong.

Usually, ipatong ni sa cost. Maoy hinungdan nga momahal ang butang o serbisyo nga bayran. Ug tungod kay nindot man gayud kaayo ning kuwarta, gawas sa standard commission, i-over price pa gyud, ilabina kun i-waive ang bidding ug pre-audit, kaylagi, emergency purchases.

Mao kaha ni ang nahitabo karon sa preparasyon sa ASEAN Summit? Happy days diay kini karon alang sa mga "commissioner" ug mga "over pricer."

Kon standard kini sa mga transaksyones sa gobiyerno, kinsa man ang mo-imbistigar niini? Moimbistigar ba ang gobiyerno sa iyang kaugalingon? Wala gyud tay dag-anan ini, Dro?

Ang akong hadlokan ini, Dro, nga tapus sa Summit maputos kita dinhi sa Sugbo, sa dagkung utang. Ambut kon cash basis ba ning ilang mga gasto karon. Tingalig magsiga lang nya ang mga mata sa mga contractor sa daghang mga serbisyo ug materyal nga gigamit sa Summit.

Samtang usa kini ka historic nga hitabo sa atong nasud ug sa atong lalawigan, apan atong nakita nga medyo ni-overact ta sa atong mga preparasyon, to the extent nga mahasul na hinuon ta.

Ang tanang Sugbuanon nag-ampo sa kalampusan sa Summit. Apan, di lang ta mag-OA ug di kaayo nato palabihan ang gasto. Kon mahimo, di lang una mangomisyon, di lang una mag-over price. Mahimo kaha ni nato, Dro?