Maayong mo-abi-abi

Dinhi sa atong lindog dili lang mga salawayong buhat maoy atong tukion ug hisgotan. Hatagan usab natog pasidungog dinhi ang maayong mga buhat ilabi na kon akong makita nga takos gayod kini sa pagdayeg. Niining tungora, hatagan kog luna kining text sa usa ka magbabasa nga gustong mopadangat sa iyang kinasingkasing nga pasalamat ngadto sa mga kawani sa usa ka tambalanan.

Ang iyang text nagkanayon: "Good day, Sir. Palihog lang kog publish niining akong text. Akong mainiton nga pagdayeg ug dakong pasalamat sa management and staff sa Don Vicente Sotto Hospital sa ilang unique nga pagtagad sa akong mata last month. Maayo kaayo sila moabi-abi sa mga pasyente. Very hospitable sila, lahi sa ubang government hospital mao nga very proud ko sa VSMMC." -- 0906-7516281 (November 3, 1006 -- 10:47:46)

Kanindot unta kun ingon pa niini kanunay ang madungog natong komento gikan sa mga pasyente nga nakasulay sa panerbisyo sa mga ospital sa kagamhanan. Baya na man kanang uban. Kanunay lang gisaway tungod kay walay hinungdan ang serbisyo. Morag dili government hospital. Lisodlisoron pa ang pasyente. Ang mga kawani morag wala magdawat og suweldo nga gikan sa mga magbubuhis. Salamat nga aduna pa diay hospital sa kagamhanan nga maayo moserbisyo sa katawhan, ang Don Vicente Sotto Memorial Medical Center. Kodus sa maayong buhat!

* * *

Sa laing bahin: "Good day. Nakadawat kog text message sa 0919-4840805, niingon nga nakadaog ko. Hinaot unta nga masumpo ang ilang pangilad. P950,000 kuno ang akong nadaog sa PCSO Millionaire's Draw." -- 0921-4232152 (Oct. 27, 2006 -- 10:06:33)

Lisod kaayong sumpoon kining maong estilo sa modus operandi. Ang bugtong paagi aron makalikay niini mao ang dili pagtuo sa mga text nga "too good to be true." Ang tinamban nga analisis niini mao nga dili ka gayod makadaog kon wala kay pustapusta o wala ka moapil sa bisan unsang promo. Busa ayaw kamog tuo sa text scam. I-disregard dayon ninyo kon makadawat mog text nga mopatuo nga nakadaog mo.

* * *

(Sumbong ug reklamo? Text sa 0910-8105522)