EDITORYAL – Watusi nagsugod nag piti-piti

Sa pagsuwat niini, 28 pa ka adlaw ngadto sa Pasko apan duna nay nagbuto-buto nga rebentador sa pipila ka mga dapit sa atong siyudad.

Naa na say mga bata nga magpabuto-buto (papiti-piti?) og watusi. Adtong unang adlaw diha sa may eskina D. Jakosalem ug M.C. Briones Sts. dunay tulo ka gagmay'ng bata nga walay sapot ang nagduwa-duwa og watusi. Ambot diin nila kuhaa kini. Ug ambot diin sila sa kuwarta nga gipalit niini kun gipalit man gani nila kini.

Dugay nang panahon nga gisugdan sa kagamhanan ang kampanya batok watusi apan anaa lang gihapon kini sa mga tindahan.

Lisud kini mapapha tungod kay kusog man ang halin niini ug ang mga pabrikante niini gipasagdan man lang. Ang kampanya anaa ra man gisentro sa mamalitay niini ug pinaagi ra sa press releases.

Nakompirmar na sa mga batid sa medisina nga makadaut ang aso gikan sa watusi ug makapatay kun makaon kini sa gagmay'ng bata kinsa way kalibutan sa kapeligro niini.