Ingon humana

Nahuman na gyod diay'ng Cebu International Convention Center (CICC) niadtong Nobyembre 15, maayo gyod diayng pagkaduma ang proyekto ug andam na gyod dia'y ni isip main venue sa 12th Asean Summit sunod buwan:

• Kay kaupat na magbalikbalik si Gobernador Gwen Garcia matag adlaw aron pagsusi sa trabaho;

• Kay napagaw na si Garcia pagpanugo sa mga trabahante pinaagi sa megaphone (hinaot nga wa nay laing makuryentihan ug mahagbong ug mainutil kay bangis nang daan paminawon ang pangasaba ni Garcia bisan way megaphone);

• Kay nanghudlat nang gobernadora sa mga kontraktor nga kon di mopaspas palayason sila sa CICC ug pulihan og lain;

• Kay wa pa diay klaro kinsay mo-suplay ug motaod sa kuti ug higanteng air-conditioning system; ug

• Kay gidugangan pag 50 ka mga kawani sa Kapitolyo ang gatosan na ka sibilyan ug sundawo nga 24 oras nang naglihok.

* * *

Atong tan-awon madutlan na ba si Cebu City Schools Division Superintendent Leonilo Oliva karong si Mayor Tomas Osmeña nay nipalayas niya sa katungdanan. Daghan nang kaso ang gipasaka sa nangreklamong mga magtutudlo batok ni Oliva apan wa siya matandog. Bisan nagsunod na silang kanhi kongresista Joy Augustus Young ug Konsehal Jocelyn Pesquera pagsaway niya, wa siya matarug.

Ang naandan sa Departamento sa Edukasyon mao nga upat ka tuig rang makahupot si Oliva sa katungdanan. Apan usa ka dekada ug tunga na siyang nagtungkawo sa puwesto. Matod sa mga magtutudlo giwarawarahan silang Oliva sa iyang appointment nga may apelyidong "Cebu City." Kasaligan nakong tinubdan niila sa padrino ni Oliva dinhi mao ang gamhanang politiko nga nalingaw giunsa pagpatuman ni Oliva ang iyang mga proyekto sa mga tulonghaan.

Si Oliva gihulagway sab nga wa mangambisyon nga ma-promote. Kay ang Cebu City division maoy labing dako ug adunahan gawas sa Metro Manila.

* * *

Karong gidasonan nang Mayor Osmena ang kamandoan ni Young, nga giisnab lang ni Oliva, sa pagdili sa kalihokan nga makaiban sa panahon sa klase, sama sa Life in the Spirit Seminar (LSS), magpaugat ba gihapon si Oliva paghimo ini sa ubang mga tulonghaan? Ang eskandalo sa Abellana National School wa kabadlong ni Oliva ni sa Oasis of Love.

Sa di pa makabuylo ang mga paningkamot pag-areglo sa kaso ginamit ang gahom ug influencia sa simbahan, mangahas mi pag-awhag sa DSWS ug ubang mga imbestigador:

o Ipasaka nang kasong kriminal batok sa pari ug ilhon siya sa labing daling panahon;

o Ilhon ang kadagkoan sa Oasis nga nagpalinguglingog lang dihang gisumbongan sa mga tinun-an sa pagbinastos sa pari;

o Susihon unsay responsibilidad sa kadagkoan sa Oasis nga kapakyas pagpanalipod sa mga bata gikan sa pagpanamastamas sa pari; ug

o Pangayoan og kuwentada silang Oliva ug kakonsabong mga tagduma sa mga tulonghaan nga nangolektag kuwarta sa mga bata nga gipugos pagpatambong sa LSS.

* * *

Email: [email protected]