Ilhon ang pari

Maayo pa'g wa na lang motingog si Nonito Limchua, pangu sa Oasis of Love, labot sa ilang Life in the Spirit Seminar (LSS) sa Abellana National School (ANS). Nahadlok ko nga ang iyang pangangkon nga wa sila pahibaw-a sa giingong pagbinastos sa usa sa mga pari nga nagpakumpisal sa 600 ka mga tinun-an sa ANS kapamatud-an nga dakong bakak sa usa ka matinud-anong imbestigasyon. Kay ang 20 ka nangreklamong mga tinun-an niingon nga usa ka babayeng opisyal sa Oasis, nga nagputi busa ilang nasaypan nga madre, ilang gisumbongan nga gilainan sila sa gihimo sa tambukon ug itom nga pari samtang nagpadayon pang pagpangumpisal.

Apan inay badlungon o tawgon ang atensiyon sa pari, sa ingon kaibanan unta ang gidaghanon sa iyang mga biktima, ang "elder" sa Oasis giingon ni Ernesto Jacel, prinsipal sa ANS, nga nipasalig sa mga bata nga igo lang "nanglambing" ang pari. Ang 11 ka adlaw nga pagdumili sa Oasis pag-ila sa pari nipalambo sa mga pagduda nga ang kahugpongan inay mopatigbabaw sa mga mithi nga ilang gitudlo nahilambigit sa mas makauuwawng maniobra pagtabon ug paghilom sa kontrobersiya.

* * *

Sa way pag-ila sa pari, si Msgr. Achilles Dakay, tigpamaba sa Artsidyosesis sa Sugbo, nipahibawo sa TV Patrol Central Visayas nga gisuspenso na nilang pari sa niaging semana. Apan ang mga ginikanan sa nangangkong mga biktima kusganong niawhag ni Arsobispo Ricardo Kardinal Vidal nga ilhon ang pari sa publiko aron makatubag sa seryusong mga pasangil batok niya. Tungod sa pagtak-om sa palasyo, ang kasayuran nga naangkon sa publiko mahitungod sa pari mao rang mga paghulagway nga siya itumon, tambukon, kapin sa 40 anyos, way parokya tungod sa iyang kabadlungon ug naa madestino sa Seminario Mayor de San Carlos sa Mabolo, Dakbayan sa Sugbo.

May sukaranan ang mga Sugbuanon nga magduda sa kaligdong sa imbestigasyon sa artsidyosesis sa labing bag-ong pari nga nabulilyaso. Salamat sa kanihit sa mga pari, gidudahan ang palasyo nga nipiyong lang sa nangaging kalapasan nilang Fr. Fulton Varga sa Naga nga gipasanginlang nakigpuyo og babayeng minyo; Fr. Ornopia sa Talamban nga gipasanginlang nitalikod sa obligasyon sa pagtabang sa babayeng giingong iyang gipaangkan; sa pari sa Paknaan, Mandaue nga gipasanginlang ni-officiate sa iyang kaugalingong kasal; ug Fr. Joey Belcina sa Maslog, Danao nga gipasanginlang nanglugos sa menor de edad niyang katabang.

* * *

Tan-awa ra gyud unsa kasipsip ang atong lokal nga mga opisyal. Si Ambassador Marciano Paynor nipasabot nga wa kinahanglana ang pagsera sa kadalanan sa di pang Asean Summit ug kun gikinahanglan man gyud ang dry run himuon ni sa alas-3 sa kadlawon aron di mahiagom sa wa kinahanglanang kahasol ang mga Sugbuanon.

Apan salamat sa ilang ka-OA, ang lokal nga mga tigpasiugda maghimo gyud og dry run unyang Disyembre 1, kanus-a tak-opan ang mga ruta sa unom ka oras, 8-11 sa buntag ug 2-5 sa hapon.

* * *

Email: [email protected]