Kinsay labing maayo?

Atong nasaksihan ang dakong kumbati tali ni Manny Pacquiao ug Erik Morales didto sa Las Vegas, Nevada sa niaging semana. Ato sab nga nasaksihan kun giunsa sa pagkulata ni Pacquiao ang iyang karibal sa ring sulod lamang sa tulo ka hugna.

Daghan ang naghinamhinam sa maong makasaysayanong kumbati. Gani, gitagna nga ang ikatulo nga sangka sa duha ka banggiitang boksidor molabaw pa sa duha nila ka away diin pulos sila dunay tagsa ka daug.

Hinuon sa labing ulahi nilang away, wala na gayud mosaler ang panghambog ni Morales nga iyang pahagbaon si Pacquiao isip balos sa iyang pagkalukapa sa ikaduha nilang sangka. Gilamoy niya ang iyang mga gipanghinambog tungod kay siya hinuon ang nadisgrasya sa ilang ikatulong kumbati sa dihang makatulo siya gipalukapa sa Filipino boxing sensation.

Sa ilang ulahing sangka, klaro nga mas kusgan ug preparado si Pacquiao, bisan pa man sa gikatahong hilanat nga miigo kaniya sa adlaw mismo sa ilang away. Dili usab nato ibaliwala ang preparasyon ni Morales tungod kay iyang gibuhat ang tanan alang sa iyang labing dako nga kumbati sa ring.

Gani dako kaayo nga balita ang preparasyon ni Morales alang sa maong away. Ug mi-hire pa siya'g mga nutritionist ug mipakunhod sa iyang timbang pinaagi sa inila nga Velocity Sports Performance sa Estados Unidos.

Apan kining tanan wala magsilbi tungod kay nagkulang ang iyang diskarte sa dihang gipalukapa siya sa atong boksidor.

Sa unang higayon sa iyang sa propesyon sa pamoksing, giangkon ni Morales nga natilawan niya ang ka kusog sa suntok sa iyang kontra. Siya miadmiter nga gilupig gayud siya sa kusog ni Pacquiao niadtong higayona. Gani iya pang gidayeg si Pacquiao nga maoy labing maayong bosidor sa ilang debisyon karon.

Niining bag-ong kalampusan ni Pacquiao, miinit karon ang debate kun kinsay ilhong labing maayong boksidor sa Pilipinas tali kaniya ug Gabriel "Flash" Elorde, ang labing bantogan nga Pilipinong kampiyon pipila na ka dekada ang nakalabay.

Daghan ang miingon nga wala pay makatupong ni Elorde tungod kay tulo ka debisyon nga kampiyonato ang iyang gikuptan kaniadto. Matud niadtong mga edad-edaran, walay katarungang dili ilhon si Elorde nga labing maayong boksidor sa nasud tungod kay mikupot kini'g bakos isip kampiyon sa kalibotan sulod sa pito ka tuig.

Apan dili usab magpalupig ang mga fan ni Pacquiao tungod sa maayo niining gipakita sa pamoksing dili lamang sa Pilipinas. Gani ilang giila si Pacquiao nga labing maayong boksidor sa Asya karon.

Hinuon, dili nato malalis nga pulos bantogan ibabaw sa ring si Elorde ug Pacquiao ug angay lamang ilhon nga labing maayong mga boksidor sa kasaysayan sa Pilipinas. Apan aduna pay taas nga panahon si Pacquiao ug kun magpadayon ang iyang maayong performance sa pamoksing, hayan nga malabwan niya si Elorde isip labing maayong boksidor sa Pilipinas.

Hinuon usa ka dakong bintaha ni Pacquiao ang giingong ipasidungog kaniya isip "Fighter of the Year" sa American Sportswriters Association. Gani, wala pay Asian boxer ang nakadawat niining labing prestihiyosong pasidungog, bisan pa si Elorde.

Kun makuha gayud ni Pacquiao ang maong pasidungog, hayan nga siya nay ilhong labing maayong boksidor gikan sa Asya. Ug dili layo ang posibilidad nga matuman kini tungod kay daghan sa mga American sportswriter ang giingong mobotar kang Pacquiao tungod sa maayo niyang performance ibabaw sa ring ning tuiga.

Hinuon dili na ikalalis nga ang giilang "PacMan" gikan sa General Santos City mao unya ang ilhong labing maayong boksidor dili lamang sa Pilipinas kun dili sa Asya.

* * *

(Ipadala inyong komentaryo sa [email protected])