Dupa sa waldas

Apil sa P1.9 milyones nga gipangayo ni Lapulapu City First Lady Paz Radaza alang sa makabusdik nga paniudto (gipasaligan ko sa usa sa mga tigpasiugda nga mas modako pa gyod untang gahin kon wa pa matangtang ang butong nga tag-P500 matag usa) ug duguong kalingawan alang sa mga kapikas sa heads of state sa Asean mao ang P100,000 nga itukod og payag nga sunugon atol sa mas gastuso nga ikaduhang pagluba ni Ferdinand Magellan sa kabaybayonan sa Mactan karong tuiga (una siya gipatay ni Lapulapu sa "Kadaogan sa Mactan" niadtong Abril). Kuwestiyonable nang daan ang pagpaburot sa presyo sa payag nga sunugon aron tingali nga sa ilang kalingaw makalimot ang mga langyaw sa kadako sa kalainan tali sa gahin ug sa gasto sa ilang paniudto, mas eskandaluso ni ngadto sa mga mata sa gatosan ka mga pamilya kansang mga panimay gipangguba aron paghawan sa agianan ug paghingpit sa kaanindot sa palibot alang sa makasaysayanong Asean Summit.

* * *

Usa sa labing kahibulongan nga gastohan nga gisumiter ni Radaza ngadto sa National Organizing Committee mao ang dako kaayong kantidad sa "tent rental" ug "tent repair." Nganong kinahanglan pa mang ayuhon ang mga tolda nga ang gidak-on sa gahin makatino man nga ang labing mahalon nga mga tolda maoy maabangan?

Kay gikatahong wa na man tinggi ni Radaza ang kutikutihan niyang kaubanan, dunay nangahas pagluwat og pangagpas: Nanagana tingaling daan si Radaza (kay ang usa ka tinuod nga lider kinahanglan mang molantaw sa unahan) nga kon mahibawo ang mga artistang modala nilang Lapulapu ug Magellan nga mas dako kay sa ilang talent fees ang gahin sa payag nga sunugon, labi na gyod kon makalili sa higanteng kalainan tali sa gahin ug sa aktuwal nilang madawat, peligrong maabot ang ilang bugno sa mahalong mga tolda (maikog siya sa supplier nga dako ang kahigayonan nga suod kaayo nila).

* * *

Apan makapasalipod si Radaza sa pagdason ni Arsobispo Ricardo Kardinal Vidal sa binilyon ka pesos nga gasto sa pag-andam sa Sugbo alang sa summit. Matod sa prinsipe sa Simbahang Katoliko, kansang usa sa labing dakong tahas mao ang pagpalabi sa mga kabos: Ang mga kabos naa kanunay apan ang nindot nga mga talan-awon sa summit karon pa sukad masukad nato masaksihan.

Nanghinaot kong di kinasingkasing ang sulti sa kardinal. Kay nasukwahi ang iyang pagdupa sa pagwaldas atubangan sa lapad nga kakabos sa katawhan sa labing uwahing wali sa Santo Papa, Benedict XVI, mahitungod sa katimawa: "We must adopt the compassion of Jesus, by looking upon our fellow man and loving one another fully... This has to be emphasized all the more in today's rapidly changing world, in which our responsibility towards the poor emerges with ever greater clarity and urgency."

* * *

Email: [email protected]