Babayeng tambok

Bahin sa panguot kining atong hisgotan karon. Wala akoy personal knowledge bahin niining maong modus operandi. Gibase ko lang kining akong pagtuki sa text nga akong nadawat. Manghinaot ko nga pinaagi niini makatampo kita sa pagpahimatngon sa atong kaigsuonan aron dili sila mabiktima sa panguot.

Ang text nga akong nadawat nagkanayon: "Naa koy pabantayan sa publiko. Diha sa may Leon Kilat ug Colon naay babayeng tambok nga magdala og payong. Naa sad na siyay kuyog nga laing babaye nga maru gyod og nawong. Naa poy kuyog nila nga lalaki nga sigahon og mga mata. Mga mangunguot na sila. Mangabli og bag busa ayaw gyod mog tanga-tanga. Ibutang gyod ang bag sa atubangan aron dili mabiktima." -- 0915-6515441 (October 20, 2006 -- 17:18:43)

Pahimatngonan nato ang atong kaigsuonan nga magbantay niining babayeng tambok nga may kauban nga laing babaye ug lalaki nga sigahon og mata. Tingalig mabiktima mo niining mga tawhana kon ugaling mahitapnas mo dihang dapita sa may Colon ug Leon Kilat. Ayaw gyod mog kompiyansa sa mga mangunguot.

* * *

Duna koy nadawat nga reklamo gikan sa mga ginikanan kinsang mga anak migradwar sa school year 2004-2005 sa San Roque High School sa San Roque, Mabini, Bohol. Ang reklamo sa maong mga ginikanan mao nga wala pa gayod madawat nila ang yearbook sa ilang mga anak hangtod karon. Dagko ra ba (kuno) ang ilang kontribusyon sa maong yearbook pero nasagmuyo sila kay wala man ing yearbook nga mitumaw hangtod karon.

Gihatag sa reklamanteng mga ginikanan ang ngalan sa magtutudlo nga maoy angay manubag kalabot sa kalangan sa pag-release sa year book. Pero in fairness sab ngadto kaniya, wala lang una nako ibutyag ang iyang ngalan. Apan gusto ko nga iyang ipatin-aw ang iyang habig kalabot sa reklamo batok kaniya. Bisan wala ko siya hinganli, nasayod kong makasabot siya nga siya ang buot kong ipasabot kon makabasa siya niining maong lindog. Unsa man ka tinuod, Ma'am, kining pasangil sa mga ginikanan batok nimo?Tubaga kuno kini palihog!

* * *

(Sumbong ug reklamo? Text sa 0910-8105522)